Ich Goetfrit der Sebekche vnd ich Chuenigunt sein hausurowe. Wir vergehen vnd tun chunt allen den di disen brief lesen oder ho^erent lesen. di nv lebent vnd hernach chu^enftich sint. Daz wir mit vnser erben gueten willen vnd gunst mit verdachtem mu^et vnd mit gesampter hant zu^e der zeit do wir es wol getuen mochten Recht vnd redleich ze einem wider waechsel gegeben haben. Den erbern gaestlichen Herren Propst Seyfriden von Hertzogenburch vnd dem Conuent gemain des selben Gotshaus vnd allen irn nachchomen vnsers rechten aygens Neun Schillinge wienner phenninge geltes gelegen Sechs Schillinge geltes ze wilfleinstorf auf bestiftem gu^et behauster holden vnd drey Schillinge geltes ze Toppel auch auf bestiftem gut behauster holden mit allem dem nutz vnd recht als wir die selben Neun Schillinge geltes in aigens gewer her pracht haben, also daz die vorgenanten gaestlichen Herren ze Hertzogenburch die selben Neun Schillinge geltes suln furaz ledichleich vnd vreileich haben vnd allen irn frumen damit schaffen verchauffen versetzen vnd geben swem si wellen an allen irresal. Da wider so habent si vns auch ze einem widerwaechsel gegeben irs rechten aigens Neun Schillinge wienner phenninge geltes gelegen ze Ziegstorf auf bestiftem gut behauster Holden, damit fu^erbaz auch allen vnsern frumen ze schaffen als vns daz aller peste wol chu^em vnd fu^ege an allen irresal. vnd sein auch wir ich Go^etfrit der Sebekch vnd ich Chu^enigunt sein hausurowe. vnd ich Ru^eprecht ir baider sun. vnd ich Nichlas der Sebekche hern Go^etfrits pru^eder vnd vnser erben vnverschaidenleich der vorgenanten Neun Schillinge wienner phenninge geltes ze wu^elfleinstorf vnd ze Toppel der egenanten gaestleichen Herren ze Hertzogenburch recht gewern vnd Scherm fu^er alle ansprach, als aigens recht ist vnd des Landes recht in O^esterreich. Waer aber daz si mit recht an den Neun Schillingen geltes icht Chrieges oder ansprach gewunnen swaz si dez schaden nemen daz suln wir in alles aus richten vnd wider chern an allen irn schaden. vnd suln auch si daz haben auf vns vnverschaidenleich, vnd auf den vorgenanten Neun schillingen geltes die si mir Go^etfriden dem Seebekchen mir Chu^enigunden seiner hausurowen ze einem wider waechsel geben habent. vnd auf allem vnserm gu^et daz wir alle vnverschaidenleich haben in dem Lande ze O^esterreich. wir sein lebentich oder tode. Vnd daz diser wider waechsel fu^erbaz also staet vnd vnzerbrochen beleibe. Dar vber so geben wir In disen brief zu^e einem warn vrchu^ende vnd zu^e einer ewigen vestnunge diser sache versigilt mit vnser dreyer Insigiln. Diser brief ist geben ze wienne nach Christes gepurt drevtzehen Hundert lar dar nach in dem Ayns vnd fu^emftzgisten iar des Samstages in der Chottember ze Phingsten.

Source Fulltext: FAIGL, Herzogenburg (Wien 1886) S. 197-198