Ich Christan der Stayner vnd mein erben vergich vnd tuen chvnt allen den di disen prief ansehnt ho^ernt oder lesent daz ich mit wol bydachtem muet vnd mit gueten willn vnd rat meyner freunt, ze den zeiten do ich iz wol getuen mocht recht vnd redleich verchauft hab dem erbern mann meym bysunderm freunt Wyldung von Wyldungsmawer vnd seynen erben meyns rechten vreyn chaufaygns zehen phunt gelts, di gelegen sint in dem Swerzenpach vnd di ich gechauft hab wyder meyn O^ehaym hern fridreich von leyden vnd seyn erben da ze den zeiten di leut aufgesessen sint als her nach geschribn stet. des ersten fv^emf vnd achzig phening auf eyner Hofstat gelegen im dorf im Swerzenpach pei der Chirichn gehaizzen der Weykinn Hofstat di nu hat Leubil im Stainchelr. dar nach an vier eyn phunt auf eym lehen daz nu hat Stephan der Schueste,r im Staynchelr vnd seyn gemayner, dar nach seichzig phennig auf eyner Hofstat im dorf di Pernolt hat. dar nach fv^emf vnd achzig phennig auf eyner Hofstat di Seydil im Eck hat. dar nach an zehen zuelf Schilling auf eym Hof den Chuenrat im Pach hat dar nach an seichs zehen Schilling auf eym Hof den Hertil am weg hat vnd seyn gemayner. dar nach fv^emzig phennig auf eyner Hofstat di da hat Chuenrat der Amman vnder der Staynwant. dar nach zwelfthalbn schilling auf eym Hof gehaizzen der Mayhof den da hat Wolfil vnd seyn gemayner. darnach zwelf vnd eyn halb phunt auf eyner hofstat di da hat Hainrich Pirichan, dar nach sybn schilling vnd vierczehn phennig auf eym hof den da hat Dietreich am Marchweg vnd seyn gemayner. dar nach fv^emf vnd achzig pfennig auf eyner hofstat di da hat Dietil der Streyher, darnach drey schilling vnd zehn phennig auf eyner Hofstat di da hat Wentil vnd ier sv^on im Winthag. dar nach vier vnd eyn halb phunt auf eyner Hofstat di da hat Hainreich am Chepilperg. dar nach an acht eyn phunt auf eym Hof den da hat Stephan am Chepilperg vnd seyn gemayner. Daz selb vorgnant guet hab ich egnanter Christan der Stayner verchauft dem vorgnanten Wyldung von Wyldungsmawer vnd seyn erben mit alle dev vnd dar zv^e geho^ert, ze veld ze dorf ze Holtz ze wysmat gestift vnd vngestift versuecht vnd vnuersuecht Od wi iz gnant ist vnd mit allem dem recht vnd gewer als ich iz her pracht hab, vmb anderthalb hundert phunt phennig wienner mu^encz der ich gantz vnd gar gericht vnd gewert pyn. vnd schol auch der vorgnant Wyldung von Wyldungsmawer vnd sein erben mit dem vorgnanten guet alln ir fruem schaffen mit verchaufen mit versetzen mit verschaffen mit vergeben wi si welln oder wi iz in aller pest fuegt. Vnd pyn ich egnanter Christan der Stayner vnd meyn erben des selben guets ier rechter scherm vnd gewer vor aller ansprach nach des lants recht ze O^esterreich. . . . Daz di red vnd daz gelub stet vnd vnczprochen weleib dar vber gib ich egnanter Christan der Stayner dem vorgnanten Wyldung von Wyldungsmawer vnd seyn erben disen prief ze eynem waren vrchund versigelt mit meym anhangunden Insigel. vnd mit der erbern herren hern fridreichs des Atzenprukker. vnd hern Gotschalks des flachenekker, vnd Vlreichs des blanchenstayner anhangenden Insigeln di diser (sach) vnd wandlung auch gezeug sint mit irn Insigeln. Der prief ist gebn nach Christs gepu^erd v^eber dreuzehn hundert iar dar nach in dem zwai vnd fumczkisten iar an Sand Thomans tag des zwelfpoten.

Source Fulltext: FAIGL, Herzogenburg (Wien 1886) S. 204-206