Ich Alram von Poting vnd ich Dorothea sein Hauzzvraw vnd vnser paider erben wier veriehen vnd tuen chund offenbar an dem prief allen leuten daz wier mit verdachten muet vnd tzu der tzeit do wir is wol getuen machten vnd nach vnserr pesten vreunt rat vnd willen hawen verchauft datz Gotzensdorf pey der Traysem ein Weintzuerl gericht, des do sind tzwen Weingarten vnd ain Hofstat vnd aecher die dor in gehorent tze veld vnd tze dorf gestift vnd vngestift versuecht vnd vnuersuecht wie so daz genant ist vnd als is mier vorgenantem Alram gewen wart tze rechter Haimsteur tzv meiner Hauzzvrawen vrawen Dorothee vnd mit allen den rechten vnd nutzen vnd Aygenschaft als wier is gehabt hawen also hab wier is ze chauffen gewen dem erbern gaestleichen mann hern Chuenraten dem Loechlaer vnd auch der Samenung Sand Joergen Gotzhaus ze Hertzogenbuerch wesunderleich den herren auf ier Oblay vmb dreyzzich phunt phennig gemainer wienner mu^enizz der wir recht vnd redleich gewert sein vnd schullen auch die vorgenanten herren mit dem vorgenanten guet allen ieren frumen schaffen verchauffen versetzen gewen wem se wellen mit vnserm guetleichen willen vnd schull wier se dor an nindert irren, nuer dor tzue fuedern. Wier sein auch des egenanten guetz ier recht scherm vnd gewer fuer all ansprach noch Landes recht in Osterreich. Waer auer daz se an dem vorgenanten guet mit recht icht schaden naemen den schull wier in allen ab legen vnd schullen se in hawen auf vns vnd auf allem dem guet daz wier hawen oder lazzen in dem Lant ze Osterreich wier sein lewentig oder tod. Daz lob wier in als tze laisten mit vnsern treven an als geuaer. Daz die red all staet vnd vntzebrochen weleib von vns vnd von vnsern erben dor vber so geb wier dem vorgenanten Sand Io^ergen Gotzhaus vnd den herren do selbs disen prief versigelt mit meinem aygenhaften anhangunden Insigel tzv einer waren sichtigen vrchund diser sach. Der sach sind auch tzeug Dyetreich der Haertweigstainer vnd Pylgreim der flaeminch mit ieren aygen anhangunden Insigel. Der prief ist gewen do man tzalt von Christi gepurt dreuczehen hundert ior dor noch in dem vyer vnd fu^emfczigisten ior des nächsten Mitichen noch dem Phingst tag.

Source Fulltext: FAIGL, Herzogenburg (Wien 1886) S. 212-213