Ich Christan der Stainer vnd mein Erben, wier veriehen vnd tuen chunt offenwar mit disem prief allen den di in lesent sehent oder horent lesen, di nv lebent vnd her nach chunftich werdent. Daz wier mit verdachetem mvet vnd mit gesampter hant vnd nach rat vnser pesten freunt. ze der zeit da wier iz wol getuen machten. recht vnd redleich verchauft haben, vnsers rechten freyn aygens zehen schilling geltes wienner phenning. di da gelegen sint in dem dorff ze Hautzenveld auf einem Lehen da zv den zeiten auf gesezzen waz Pravnwort der maurer. vmb sibentzehen phunt gemainer wienner phenning. dem erbern man hern Jansen dem Wildungzmaurer vnd sein erben. vnd der wier gar vnd gantz vericht vnd gewerd sein. Also beschaidenleichen daz der vorgenant her Jans vnd sein Erben mit dem obgenantem gult allen ieren frum schvln schaffen mit in haben vnd mit verchauffen vnd mit versetzen vnd geben vnd machen swem si daz wellen an allen irrsal. wier sein auch der vorgeschoben gult ier recht scherm vnd gewaer. als aygens recht ist nach dez Landes recht in Osterreich. gieng in dar an icht ab von ansprach oder mit recht. daz schullen si haben auf vns vnd auf alle vnserm guet. daz wier haben in Steyr oder in Osterreich oder wo wier iz haben. wier sein lembtich oder tod. Daz lob wier in alles staet ze haben mit vnsern trewen an als gevaer. Vnd daz disev red furwas stet vnd vnzebrochen beleib gib ich dem egenanten hern Jansen dem Wildungzmaurer vnd sein erben disen brief versigelten mit meinem anhangundem Insigel. vnd mit meines Ohems anhangundem Insigel Vlreichs des Planchenstainer, vnd mit hern fridreichs Insigel dez Atzenprukker. vnd mit hern Hainreichs Insigel des Atzenprukker. vnd mit Vlreichs Insigel dez Atzenprukker. dev der obgeschriben sach zeug sint mit iern anhangunden Insigel. Der brief ist geben nach Christes gepu^erd Dreutzehen hundert Jar dar nach in dem sechs vnd fumfczikistem Jar. an sand Phillipp vnd sand Iacobs tag.

Source Fulltext: FAIGL, Herzogenburg (Wien 1886) S. 220-221