Ich Hainreich von Hulls vnd ich Agnes sein Hausvrawe. vnd vnser baider erben. Wir veriehen vnd tuen chunt allen den di disen prief lesent. oder horent lesen. di nv lebent. vnd hernach chunftich werdent. Daz wir mit aller vnser erben guetem willen vnd gunst mit verdachtem muet. vnd mit gesampter hant. vnd nach vnser pesten vreunt rat. zv der zeit do wir iz wol getuen mochten, verchauft haben vnsers rechten Aygens. vnser hof gelegen ze Aetzleinsperg. vnd alles daz. daz zv^e dem selben vnserm hof geho^ert Holtz. wismad. pawe. phenning gult. paungarten. vnd swaz man in den selben hof dient von den weingarten gelegen in dem haesental. vnd alles daz. daz zv^e dem egenanten vnserm hof gehoret, als vor geschriben ist. ze velde vnd ze dorf. iz sei gestift oder vngestift. versuecht oder vnuersuecht. swie so daz genant ist. vnd des selben hof. vnd alles des. daz dar zv^e gehoret. ist mich vorgenanten Hain r eichen von Hulls ein drittail anerstorben von meinem enen. hern Vlreichen von Ternwerch. dem got genade. vnd ein drittail des selben hof. vnd alles daz. daz zv^e dem selben drittail gehoret. han ich gechauft von meinem swager hern Albern von Mainwerch dem got genad. vnd von seiner hausvrawen vrowen Margreten meiner muemen. Vnd han auch ich vorgenanter Hain r eich von hulls den vorgenanten hof vnd alles daz daz dar zv^e gehoret geledig vnd gelost von den Juden vmb daz gelt, daz in der egenant mein en her VIreich von Ternwerch vnd sein hausvrawe. vrowe Alhait mein An der auch got genade mit gesampter hant schuldig gewesen sint. den vorgenanten hof. vnd alles daz. daz dar zv^e gehoret. als vor an disem prief geschriben stet. an di tzehent di dar zv^e gehorent. di nym ich Hainreich von Hul1s mir besunderleich vor aus. haben wir recht vnd redleich verchauft vnd gegeben mit allen den nvtzen vnd rechten als wir iz in aygens gewer her pracht haben, vmb anderthalb hundert phunt wienner phenning der wir gar vnd gaentzleich gewert sein. den erbern gaeistleichen hern Probst Seyfriden des Gotshaus ze Hertzenburch vnd dem Conuent gemain des selben gotshaus. vnd alln iern nachchomen fu^erbaz ledichleich vnd vreileich ze haben vnd allen iern frum da mit ze schaffen, verchauffen versetzen vnd geben swem si wellen an allen irrsal. Vnd sein auch wir. ich Hainreich von Hulls vnd ich Agnes sein Hausvraw vnd alle vnser erben vnuerschaidenleich des vorgenanten hof vnd alles des daz dar zve gehoret, vnd daz wir in dar zu^e ze chauffen gegeben haben, als vor an disem brief geschrieben stet. der egenanten gaeistleichen hern gemain des Gotshaus ze Hertzenburch. vnd irn nach chomen recht gewer vnd scherm fu^er alle ansproch, als aygens recht ist vnd des landes recht ze Osterreich. Wer aber daz si mit recht an dem selben hof vnd an alle dev vnd dar zv^e gehoret als vor geschriben ist icht chrieges oder ansproch gewunnen. swaz si des schaden nement. daz schulle wir in alles aus richten vnd wider chern an allen irn schaden, vnd schullen auch si daz haben auf vns vnuerschaidenleich vnd auf allem vnserm guet. daz wir haben in dem laut ze O^esterreich. oder swo wir iz haben wir sein lebentich oder tod. Vnd daz diser chauf furbaz also stet vnd vnczebrochen beleib. dar vber so gib ich vorgenanter Hainreich von Hulls In disen brief ze einer warn vrchunt diser sach versigelt mit meinem anhangundem Insigel. vnd mit meiner nasten vreunt Insigel. di hernach geschrieben sint. des erbern hern. hern Leupolts von Sachsengang zv den zeiten pharrer datz Sand Stephan ze wienn. vnd mit Chunrats von Sachsengang seins vetern. vnd mit hern fridreichs des Atzenprukker. vnd mit hern Ortolfs des Chulber ze den zeiten Chelermaister. des hoch geporn fuersten hertzog Albrechts in Osterreich. di all diser sach gezeug sint. mit irn anhangunden Insigel. Der prief ist gegeben ze wiennen nach Christes gepu^erd Dreutzehen hundert Jar. dar nach in dem Siben vnd funfczigistem Jar. des maentags an dem achten tag. nach sand Phylipps vnd sand Iacobs tag.

Source Fulltext: FAIGL, Herzogenburg (Wien 1886) S. 222-224