ICH Chvnrat von Vreuntzhausen vnd Wolfcher der Reychelsperger vnd Leb hern Chunrats pruder vergehen offenbar mit dem brief das wir lauterlich durch got gepeten habn den wirdigen herren Brobst Nyclon vnd alls das Chouent Sand Joerigen Gotshaus ze Herzcogenburch vmb den erbern priester hern Nyclosn den sie zu irm alter Sand Katrein gelegen in irm Gotshaus ze Nuzdorf gesaczt habn vnd im den durch got gelihen habn das er in verwesen sol paid an singen vnd lesen an irr stat vnverchert vnd vnverwandelt, recht als sie in verwest habn vnd chu^emfticlich nach im verwesen schullen von irm Gotshaus Herczogenburch dar vmb man im raichen schol all die nu^etze die zu dem alter geho^ernt vnd gestift sint mit phenning dienst mit chost vnd trinchen, als pilleich vnd rechtleich ist. Also beschaidenlich. ob der vor gnant her Nyclos in ein chranchait geviel so lang, das savmechait geschech des gotsdienst pei dem gnanten alter, des er nicht gewenden mocht nocht vndersten mit im selber oder mit andern priestern. des schol der wirdig vnd vorgnanter Brobst Nyclos vnd das Chouent vncholten sein an gever. Wer auer das sie vmb die savmechait anspruch gewunnen von vns oder von der pfarr menig, so schullen sie dar nach v^eber vierzcehn tag, den alter hin wider verwesen von Chloster als sie in ee verwest habn. vnd dem gnanten hern Nyclosn nichts gepunden sein alls des das zu dem alter geho^ert. Sich schol auch der oft genant her Nyclos nichts vnterwinden pferleichs rechts weder haimleich noch offenbar, is sei dann eins pfarrer guetleicher vnd gehais will. Der selb vorgnant her Nyclos schol ovch furbas nicht trachten weder mit rede noch mit pett vmb den orden vnsers Closters. Noch mer verpint sich auer der selb her Nyclos vmb ein Jeuch weingarten in den Thelren gelegen das er nach seim tode zu der Cappeln Sand Katrein ewigen wil zu einem sell geret, dar vmb ein ygleich Chapplan do selbs begen schol jerleich einn Iartag des nachtes ein Vigilie singen mit drin Lezten vnd des Morgens ein sell ampt vnd ein ygleich priester ein ganzce Vigilie sprechen des tags nach seiner andacht vnd sein gedenchen in der Mezz. dar vmb ein Chapplan ze Nuzdorf raichen schol eim pfarrer do selbs vier vnd zcwainzcig phenning vnd zcwain herren ygleichen fv^emfzcehn. Wan er des nicht tuet vnd is doch wol getuen mag so ist der Weingort veruallen eim pfarrer ze Nuzdorf, Wer auer das der oft gnant her Nyclos in ein chranchait geuiel, das er den weingorten nicht versporen mocht, so schol er alln seinn frvmen do mit schaffen mit versezcen oder mit ver chauffen an alln irsal. Des verpint sich der selb gnant her Nyclos hinder vnser vorgnanter dreyer anhangenden Insigel, hern Chunrats, Wolfchern vnd Lebn, alls stet ze gehalten mit ganzcen treuwen. Der brief ist gebn nach Christs gebu^erd Dreyzcehen Hundert Iar dar nach in dem zwain vnd Sechczkisten Iar an Sand Achacii tag vnd seiner geselleschaft.

Source Fulltext: FAIGL, Herzogenburg (Wien 1886) S. 243-245