ICH Ruedolf von Losenstain vnd ich Margaret sein hausvrow ich Peter von Losenstain sein sun wier vergehen fu^er vns vnd fu^er alle vnser erben vnd tu^en chunt offenleich mit dem brief allen den, die den brief lesent oder horent lesen die nu lebent vnd hernach chv^enftich sind. Daz wier mit aller vnser erben gu^etem willen vnd gunst mit wolbedachtem mu^et mit gesampter hant vnd nach rat vnser pesten vreund zu der zeit do wir es mit recht wol getu^en machten Verchauft haben vnsers rechten freyen Aygens die gu^eter die hernach geschriben stent die ich obgenanter Ru^edolf von Losenstain vmb mein aygenhafts gu^et gechaufft han von meinem swager hern Fridreychn Marschalich von pappenhaym vnd die gelegen sind ze oberndorf pay der traysem zwischen Retelperg vnd viehofen in Hertzogenburger pharr des ersten vnsern hof gelegen da selbs zu Oberndorf mit alle dew vnd darczu^e geho^eret, es sei paw waid holcz weydech ze veld vnd zu dorf es sei gestifft oder vngestift versuecht oder vnuersuecht wie so daz genant ist oder wo daz gelegen ist vnd ein Lehen da selbs da weilen Angnes Leben tochter auf gesezzen ist mit alle dew vnd darczu^e gehoret wie daz genant ist oder wo is gelegen ist vnd zway phunt fu^emf schilling vnd vierczehen phennig wienner mu^ennze geltes gelegen daselbs ze oberndarf auf dritthalben lehen vnd auf newn Hofsteten bestiffter gu^eter vnd wehauster holden vnd zway phunt drey schilling vnd siben phennig wienner mu^ennze geltes auch daselbs gelegen auf vberlend Darczu^e haben wir verchauft vnser vischwayd gelegen daselbs ze Oberndarf. Die vorgeschriben gu^eter alle als si vor an dem brief benant sint mit alle dew vnd darczu^e geho^eret ze velde vnd ze darffe iz sei gestift oder vngestift versuecht oder vnuersuecht wie so daz genant ist vnd wo iz gelegen ist haben wir recht vnd redleich verchauft vnd geben mit allen den nuczen vnd ern vnd rechten als wier is alles in aygens geber her pracht haben vnd als is mit alter her cho^emen ist vnd als wier is gechauft haben von meim obgenanten swager hern Fridreychen Marschalich von pappenhaym vmb drew hundert phunt wienner phennig der wier gancz vnd gar verrichtet vnd gewert sein Dem erwirdigen geistleichen herren hern Niclasen Probst des Gotzhaus ze Herczogenbuerch der die vorgenanten gueter gechauft hat vmb sein aygenhafts verspartes varund gu^et ze sand Katherin Cappelln die er in dem selben Gotshaus ze Herczogenbu^erch ze stiften vnd ze widemen gedacht hat Also daz die vorgeschriben gueter alle bei der selben Cappeln fu^erbas ewichleich beleiben schulln an allen chrieg vnd irrsal vnd durich pezzer sicherhait so secz wier vns ich obgenanter Ru^edolf von Losenstain ich Margaret sein Hausurow ich Peter von Losenstain sein sun vnd alle vnser erben vnuerschaidenleich v^eber die vorgenanten gu^eter alle die wier gehabt haben ze Oberndarf als si vor an dem brif verschriben vnd benant sint der obgenanten sand Katherin Cappelln vnd allen den die der selben Cappelln phleger vnd verweser sint ze rechten gewern vnd scherm fu^er alle ansprach als aygens recht ist vnd des Landes recht ze Osterreich wer aber daz in fu^erbas an den selben guetern icht abgieng mit recht oder ob si mit recht icht Chrieges oder ansprach daran gewunen von wem daz wer daz si dez schaden nemen Daz schulin wier in alles ausrichten ablegen vnd widercheren an alle ier mue vnd an allen iern schaden vnd schullen auch si daz haben auf vns vnverschaidenleich vnd auf allem vnserm guet daz wier haben in dem Lande ze Osterreich oder wo wier iz haben wie so daz genant ist wier sein lebentig oder tode. Vnd daz der Chauf fu^erbas also stet vnd vnczebrochen beleih dar v^eber so geb wier in den brief zu einem waren v^erchund vnd ze einer ewigen vestnung der sach versigelten mit vnsern Insigiln vnd mit hern Dietreichs Insigil von Losenstain mein obgenanten Rudolfs Bru^eder vnd mit meins swager Insigil hern Fridreichs des Marschalichs von pappenhaym vnd mit der erbern herren Insigeln hern Stephans von hahenberch vnd hern Stephans von hahenberch seines suns ⁶³ die wier dez vleizzichleich gepeten haben Daz si des Chauffes vnd der sach gezeug sint mit iren Insigiln. Der brief ist geben nach Christes geburt dreuczehen Hundert iar darnach in dem acht vnd Sechczgistem Iare an sand Affre tag der heiligen Marttrerin.

Source Fulltext: FAIGL, Herzogenburg (Wien 1886) S. 256-257