Ich Alhait saeligen Eberharts Tochter von Chazenperch vergich offenbar an disem prieff, vnd tu^en chunt allen den dy in sehent oder lesent daz ich mit wolpedachtem mu^et vnd zu den zeiten do ich ez wol getu^en mocht geschaffn vnd gebn han meiner Muem Ann der Grabnerin zu Minpach mein weingarten den ich chauft han vmb zwelff phunt wyenner phennig der gelegen ist zu Reychersdorff am Chogel vnd hayzzet der wehdorn vnd han daz lewterlich durch got getan zu aynem hayl vnd selgeraet meinez saeligen vatter vnd meiner Mu^etter vnd mir vnd auch allen meinen vodern, also peschaydenleich daz dy egenante Vraw den obgenanten weingarten inn haben vnd nu^eczen schol mit allen den rechten vnd nu^eczen dy darzu^e geho^erent, als ander ir aygen gu^et also auzzgenomen wann daz wa^er daz dy obgenante Vraw verschied, so schol der obgeschriben Weingart geuallen dem Conuent zu Minpach vnd schol den nu^eczen vnd inhaben mit allen den nu^eczen vnd rechten dy dar zu^e geho^ernt vnd auch damit tun vnd wandeln als mit anderm aygen conuents gu^et, niemant nichts darumb noch dauon ze geben noch ze dyenen wenn vier wyenner phennig jaerleich dem Perchhern herrn Wolffgang dem Trukschaecz vnd schulln auch trewleich pitten ewichleich vmb meins vater vnd meiner mu^etter vnd mein sel vnd vmb aller meiner vordern sel. Vnd daz daz allez staet vnd vnzeprochen peleib Gib ich ir disen offen Prieff, versigelt mit der Edeln meiner gena^edigen Vrawen Graefin Agnesen zu Ortenburch saeligen Eberharts witibn von Waltsche vnd herrn Wolffgangs des Trukschaecz anhangunden Insigeln dye ez durch meiner vleyzziger pett willen an disen Prieff gehangen habent in vnd allen iren erben an schaden. Mit vrchunt diczs Prieffs. Gebn nach christs gepurd drewzehen hundert jar dar nach in dem anderm vnd achtzigistem jar an sand Gregorn Tag.

Source Fulltext: FAIGL, Herzogenburg (Wien 1886) S. 304-305