ICH Janns vnd ich Jorig paid taffler von Nusdorf vnd all vnser erben veriehen offenleich mit dem Brieff vnd tun chund allen lew^eten gegenbu^ertigen vnd chunftigen daz wir . . . recht vnd redleich verchauft haben vnsers purkchrechts fumf tagwerich wismad gelegn in dem Osang zu^e traysmawr hinder dem pruelhoff vnd da man ierleich von dient an sand Michels tag zu^e rechtem purkchrecht sechs wienner phenig Jansen dem farster von Hawshaim daselbs in sein lehen vnd nicht mer. Die selb vorgenant wiss mit aller irr zu^egeho^erung als wir sey in purchkrecht gewer her pracht haben also habn wir sey zu^e chawffen geben dem erbern herren hern Chunraten von petems der die zeit sand Katrein alter ze Nusdorf verbeser vnd Kapplan gewesen ist vnd allen seinen nachcho^emen vmb sechs vnd zwainczik phunt wienner phenig der wir gancz vnd gar gericht vnd gewert sein ze rechten ta^egen also daz er hin fu^er damit allen seinen frum geschaffen mag versetzen verchauffen niezzen vnd nutzen gebn vnd machen wem er wil an all irrung als izz dem egenanten sand Katrein alter nu^etzleich vnd fu^egleich ist nach der herren ratt von hertzogenburch. Vnd dez alles sein wir sein recht scherm vnd gwer fu^er all ansprach als purchkrechts scherm recht ist in dem Land ze Osterreich. . . . vnd daz lub wir im allez stet ze haben mit vnsern trewn an geuer. vnd darzue so geb wir ich vorgenanter Janns vnd ich vorgenanter Iorig paid Taffler vnd all vnser erben dem vorgenanten erbern herrn hern Chunraten vnd allen seinen nachchomen den prieff versigelt mit vnser paider anhangunden Insigeln vnd dez gezevg ist Leb der Druchseczz auch mit seinem anhangunden Insigel im an schaden. Der prieff ist geben nach Christi gepurd drewtzehen hundert Iar dar nach in dem vier vnd achtzkisten iar an sand Michels tag.

Source Fulltext: FAIGL, Herzogenburg (Wien 1886) S. 308-309