ICH Jans Michelz Sun von Teyzz vnd ich fridreich der Pokkendorfer sein geswein vnd all vnser eriben vergechen o^effenleich mit dem brief allen lewtten de lebent oder chunftig sind. daz wir nach rat vnd gunst aller vnserr frew^ent recht vnd redleich verchauft haben vnd ze chauffen haben geben vnser freyzz aygenhaftz gut. Newn schilling geltz gelegen dacz Twenawe in Haiczendorffer Pharr der fu^enf schilling vnd achczehen phennig gelegen sind auf Hofsteten da de zeyt auf gesezzen sind. Gilig am anger vnd dient ja^erleich von ainer Hofstat vierczig phennig. Chu^enczel Choch von ainer Hofstat vier phennig. Vischel vier phennig von ainer Hofstat. Chu^enczel der Olm dreyzzig phennig von ainer Hofstat. Ernreichin von ainer Hofstat dreizzig phennig. Chu^enczel Choch von ainer Hofstat dreizzig phennig. Schelzin dreyzzig phennig von ainer Hofstat, vnd daz ander auf v^eberlent. der Raczhofen ze Tw^enaw^e dient von aim Jewch acher vnd drin viertailn dreyczehen phennig. Grazgnodin von anderthalben Iewchen funfczehen phennig die Czertlin von aim Gartten acht vnd dreyzzig phennig die Schelzin ze Twnaw^ee von czwain Jeuch acher vierczig phennig Vischel von aim viertail acher fu^enf phennig Symon am anger von aim halben Jewch fu^enf pheunig. Daz ee genant gu^elt hab wir recht vnd redleich verchauft vnd ze chauffen geben dem Erbern Geystleichen Herren Probst Jacoben ze Herczogenburch oder wer den prief inn hat zu einer stillung vnd ablo^eschung seins Gruntrechcz da er mit vns vm chrieghaft waz. also hab wir imz geben vmb achczehenthalb phunt phennig der er vierczehen phunt gen Hayczendorf zu der Chirchen gericht vnd gewert hat fur vns dar vmb wir vnser brif der dar vmb meins vater prief Mychelz von Teyzz der Chirchen stund (sic) dez andern geltz wir auch gericht vnd gewert sein ze rechten ta^egen. Ich ee genanter Jans vnd ich fridreich der Pokkendorfer verpinden vns auch vnd seczen vns ze rechtem scherm vnd gewern der ee genanten guter fu^er Nyclasen vnd fridreichen auch payd Mychelz su^en von Teyzz die dew zeit in dem Land nicht gewesen sind daz se daran fu^erbaz chain recht noch anspruch hincz dem ee genanten gut niht haben schullen. vnd darzu secz wir vns dem ee genanten Probst Jacob oder wer den prief inn hat fur all anspruch recht scherm vnd gewern als aygens recht ist vnd dez Landez recht in O^esterreich. . . . Daz daz furbaz also stet vnd vnczeprochen beleib gib ich ee genanter Jans Michelz sun vnd ich fridreich der Pokkendorfer den Prief dem ee genanten Probst Jacobn oder wem er den brief geit besygelten mit vnser payden aygen anhangunden Insigeln vnd dez sind auch zewg Chunrat der Veyrtager vnd Lynhart der friczenzstorffer mit iren anhangenden Insigeln in on schaden. Geben da man czalt von Christi gepurt drewczehen hundert Iar dar nach in dem vier vnd achczigistem Iar an Sand Pauls tag becherung.

Source Fulltext: FAIGL, Herzogenburg (Wien 1886) S. 307-308