Wir Iohanns von gotez genaden Bischof zu Regensburg Bekennen offenleich mit dem brief allen den di in an sechent lesent oder horent lesen. Daz fur vns chom der Erwirdig her heinreich Abt vnd di geistleichen der Conuent dez Chlosters zu Malherstorf in vnserm Bistwm gelegen vnd gaben vnz zu erkennen, wie daz si von grosser verderbleicher geltschuld vnd schaden wegen, dar hinder ir goczhaus pey Iren voruaren vnd auch in chomen war, verkauft hieten ewikleich dem erbern her heinreichen von Spicz zu den zeiten Richter ze Krems seiner Hausfrawn vnd allen iren erben vnd nachkomen die aygen gut vnd gult ze Traiczelstorf (sic) vnd daz dar zu geho^ert In Osterreich gelegen di ir vnd ires obgenanten goczhaus gewesen sind alz daz allez in dem kaufbrief pegriffen ist den di obgenanten her heinreich von Spicz sein Hausfraw vnd all ir erben dar vmb habent, vnd paten vns dyemu^etichleich daz wir den obgenanten kauf begunden genaedikleich ze besta^etten. Nu bestaetten wir durch der obgenanten notdurft vnd pet wegen, nach zeitigen guten rat den obgenanten kauf ganczleich mit dem brief alz verr er redleich geschechen ist mit vrkund dez briefz versigelt mit vnserm anhangunden Insigel Der geben ist zu Regensburg do man zalt von Christus gepurd drewczechen hundert Iar vnd dar nach in dem vier vnd Achczigisten Iar an sand Lucein tag.

Source Fulltext: FAIGL, Herzogenburg (Wien 1886) S. 312