WIR Hainreich von Gocz gnaden Abpt Unsers Goczhaws zu Malerhstorf⁸¹ vnd dev Sammung des gancz Conuencz do selbs gelegen in nyder Payrn Wechennen vnd Veriehen offenleich mit dem Brief fu^er Uns vnd fu^er all Vnser nachomen allen lewten lemptigen vnd chunftigen Das Wir mit gu^etem Rat vnd mit veraintem Willen von Rechter no^etdu^erft Vnser vnd Vnsers Goczhaws Wegen von der geltschuld wegen do Wir vnd Vnsern Vadern hincz den Juden in Payrn vnd Inosterreich Ingevallen vnd chommen warn, Recht vnd Redleich zu den zeyten do Wir das mit Recht wol getu^en machten, verchauft vnd zu chauffen haben geben Vnsers vnd Vnsers Goczhaws Vreys aygen Aynn Hof vnd dorf das gelegen ist in Osterreich Nyderhalb Krems inderhalben des Champfs (sic) in dem Veldgericht vnd hayst Strayczestorf in Hayczendorffer Pharr Mit zwaynczig Phunt Wienner Phennig gelcz dy auf dem dorf vnd dor zu auf Vberlend ligent dy man jerleichen inden selben Hof dinet an sand Michelstag vnd sand Cholomans tag der dinet Hans Egendorfer von seinem Hof zu Slikchendorf ayn Phunt vier Phennig vier meczen habern zwo Gens vier Hu^enr vier des vnd dint Seczigk ayr. Dew Herren von Lambach dint von Achern newn schilling vnd achthalb Phenning. Vnd dy Herren von Perchtolczgadem dint von irm Hof zu Gruntdorf sex schilling sex Phenning vnd ayn halben Mu^et charn drey meczen habern anderthalb gans drew Hu^enr vnd drey ches fumf vnd vierzigk ayr. Vnd Nicla Vischer von der Mu^el zu Sigtigendorf aynlef Schilling vnd von aynem Holcz indem Werd ze Tu^enaw ayn halb Phunt vnd von ainem Jewch Achker acht Phenning. vnd der ander gelt leyt auf dem dorf vnd auf vberlend do selbs zu Strayczestorf ze veld vnd zu dorf in der Pharr zu Hayczendorf oder wo daz gelegen ist als ez vnsrew Register wol weweysent dew Wir dor vber gehabt haben, vnd mit allevv dew vnd dor zu gehort ze veld vnd ze dorf Holcz Wayd Wismad Viswayd Weingarten Achker oder wie das genant ist nicht ausgenomen, Alles daz wir haben in Osterreich inderhalb des Champfs indem Veldgericht gehabpt haben (sic), als wir das vnd vnser Goczhaws in aygenschaft gewer herpracht vnd gehabpt haben Haben wir Recht vnd Redleich Verchauft vnd zu chauffen geben dem erbern man Hainreychen von Spicz dy zeyt Richter zu Krems vnd Stayn vnd Anna seiner Hawsfrawn vnd irn paiden erben vmb zway Hundert Phunt vnd Achczigk Phunt wienner Phenning der wir von in gancz vnd gar verricht vnd gewert sein also das sew furbas mit dem vorgenanten Hof vnd Dorf vnd mit allew dew vnd vor wenant ist, allen irn frum vnd nu^ecz do mit schaffen schullen vnd mugen Mit verseczen mit verchauffen Schaffen machen Gebem wem sew wellent wye in das aller pest wol fuegt an allen chrieg vnd Irsal vnd seczen vnd seynn auch wir Vnser nachchomen der vorgenanten gu^eter Ir Recht gewer vnd Schirm fu^er allew ansprach als soleicher vnd anderr aygner gu^eter Recht ist in dem Land zu Osterreich Vnd inn dem Veldgericht inderthalben dez Champfs. Erstu^end in aber dor vber an den gu^etern Icht chrieg oder Stozz auf mit Recht von wem daz wer die selben chrieg vnd ansprach luben vnd sullen Wir in auz richten vnd Richtig machen an allew wider Red vnd an allen iren schaden. Nemen sew dor vber indert schaden von wem das wer oder wy sich das vergieng oder fuget den sew oder Ir Erben ayns bey sein trewn gesprechen mag an ayd vnd vnwerecht den selben schaden sullen vnd wellen wir in ablegen vnd wider chern an allew wider Red vnd an all ir mue. Vnd sullen sew daz haben auf vns vnd vnsers Goczhaws Hab vnd gu^eter wo wir dy haben oder gebinnen in Osterreich oder In Pairn versucht vnd vnversucht wo sew dor auf zaygent oder choment In welcher Herschaft gepiet oder Phleg das ist do sol sew dann der selb Herr Phleger oder Amptman der selben vnserr Hab an furbot vnd an chlag der selben Hab gewaltig machen als vil vnd als verr, das sew ir scheden gar vnd gancz gericht wern vnd das In ir gut ledig vnd an zuspru^ech werd vnd in auch von vns geschirmt werd als Recht ist vnd als vor wenant ist an alles gever, das wir chainerlay wesundern Rechten Geystleich noch weltleich dor Inne nicht genyssen sullen weder vreyung noch wesunder vrey Brief noch In chainerlay weys nichcz fur ziehen sullen anders den das In alles das volfu^ert sol wern das vor an dem Brief verschriben ist an alles geuer. Wir luben in auch allew Register vnd Brief dy wir vber den vorgenanten Hof vnd Dorf vnd gult haben zu geben vnd in antwurten an alles geuer. Wer aber das wir oder von vnsern wegen oder ander Yemant furbas Indert Brief her fu^er zugen Oder fu^er cho^emen Ezz wern gelt Brief, Sacz Brief oder chauf brief dy sullen all Tod vnd ab sein vnd sullen auch gegen dem gegenwurtigen Brief chain chraft nicht mer haben weder vil noch wenichk. Vnd das dem vorgenanten Haynreichen von Spicz vnd Anna seiner Hausfrawn vnd Iren payden Erben der chauf vnd dew vorgeschribn sach allew gancz stet vnd vnczebrochen beleib, Geben wir vorgenanter Abpt Haynreich vnd der gancz Conuent fu^er vns vnd vnser nachchomen In den Brief versigelt mit vnsern payden anhangunden In Sigeln. Geben ist der Brief an Mantag vor sand Merten Tag Nach Christi gepurd Vber drewzehen Hundert Iar dor nach in dem Vyer vnd Achczgistem Iar.

Source Fulltext: FAIGL, Herzogenburg (Wien 1886) S. 309-312