ICH Katrey dye (witib) Herrn Goergens dez Truchseczen von Grub dem got genad vergich vnd tu^e chund offen leich mit dem prief allen la^ewten dy nu lebent oder her nach chu^enftig sind daz ich mit gunst vnd mit wolbedachtem mu^et vnd mit rat meiner chinder vnd meiner pesten vrewnt zw den zeyten do ich ez wol getu^en mocht gegeben hab zway tagwerich wismad vreizz aygen daz ich chawft han vmb mein aygen besunderz gelt mit aynem graben der auch dar zw geho^ert an der seyten gegen Hasendorf den erbern geystleichen herrn zw Herczogenburch vnd irem ganczen Conuent besunder zw irer chirichen ze Reydnikch daz wismad leyt niderthalb Aczlezperig vnd sto^est an daz wazzer vnd mit der maynung also daz dy zway tagwerich wismad mit all ir zwgeho^erung schullen vnuerchu^emert hin fu^er ebichleich beleyben pey dem vorgenanten goczhauzz zw Reydnikch vnd soll auch ein iesleich pharrer do selbs daz fu^erbaz ledichleich mit allen nuczen inne haben wie im daz aller pest chu^empt vnd fu^eget an gwer hin ze lozzen oder selber ze vessen vnd dar vmb haben mir dye egenanten herrn versprochen vnd auch gelubet mit trewen an aydez stat daz ein yesleich pharrer ze Reydnikch den sy aus irem Conuent da hin seczent sol allew jar ia^erleich hin fu^er ewichleich ayn ebigen Iartag pegen Got ze lob vnd ze eren vnd ze hilf vnd ze trost ayner Katreyn sel hern Go^ergens dez Truchseczen von grub ayns Gorgen sel dez Truchseczen von Grub der ir wirt ist gebesen ayns Jorgen sel der ir knecht ist gebesen vnd vmb all ir vordern vnd nachchomen sei vnd vmb all gelawbig sei also beschaydenleich an dem nochsten Suntag abent vor dem Palmtag sol man leytten vnd singen ain vigilig mit newn leczen dez morgens an dem Ma^entag sol man singen ain Selampt vnd zwo mezz sprechen vnd in dem Ampt vnd den mezzen sol man gedachtnuzz haben der vorgenanten selln ich sol auch dez vorgenanten wismacz sein ir rechter scherm vnd geber vnd all mein nachcho^emen dy der iartag angevelt an meiner stat fu^er all anspru^ech meiner gerben der meiner frewnt wazz in dar an mit recht zwspru^ech oder schaden aufstu^end von Juden oder von christen von herrn oder von dienstezz vodrung alzz freyez aygenz recht ist in dem Lannt ze O^esterreich waz in dor an abgieng daz schullen sew haben auf meiner hab vnd aller meiner chinder vnd gerben dy der iartag von mir angeho^ert vnd dez priefzz zw ainer woren vrchund gib ich vorgenantew fraw Katrey mein aygens anhangundes Insigel mit dem anhangundem Insigel herrn Hansen dez Truchseczen von Grub der sich vorzeicht dez vorgenanten wismacz vnd bestaett fu^er sich vnd fu^er seinew jungew geswistreyd vnd fu^er all ir gerben. Der prief ist geben do man zalt von christi gepurd drewczehen hundert iar dar nach in dem Newnczikistem Iar An sand Pauls tag seiner becherung.

Source Fulltext: FAIGL, Herzogenburg (Wien 1886) S. 326-328