ICH Hanns der Huelber Puerger ze Chrems vnd di zeit dez Rats daselbs vnd ich Chuengund sein Hausfraw Hainreichs von Spitz Saelig dem Got gnad Swester vnd ich Jacob der Huelber Puerger ze Krems vnd di zeit Sluzzler da selbs der vorgenanten frawn Chungund Sun vnd all vnser Erben veriehen offenleich mit dem brief allen la^ewten lemptigen vnd chu^enftigen daz wir mit veraintem rat vnd gueten willen vnser nochsten vnd pesten vrewnt vnd ander Erba^er la^ewt weisung vnd auch nach gescha^eft vnd enphelhen daz vns vnser lieber vrewnt Hainreich von Spitz sa^elig seinew Chind mit leib vnd mit gu^et enpholhen hat, vns angenumen vnd verpunden haben fu^er di Chind vnd leipleich Erben die der obgenant Hainreich von Spitz sa^elig hinder im lassen hat von ehafter not vnd grosser Geltschuld wegen Christen vnd luden dar inn di vorberu^erten Chinder ir egenanter Vater hinder ym inn lassen hat, vnd von derselben Geltschuld wegen zu grossern verderblicher schaden chomen wa^ern vnd dar vmb durch pessere nu^ecz willen den vorgenanten Chinden, haben wir verchauft vnd ze chauffen gebn ainen Hof vnd Dorff daz gelegen ist Niderhalb Chrems Inderthalb dez Champs in dem Veldgericht vnd haist Straiczesdorf⁸⁵ In Hayczendorffer pharr, Mit Czwainczik phunt wienner phennig gelts, die auf dem Dorff vnd darzu auf dem V^eberlent ligent vnd auch in andern Dorffern in der vorgenanten pharr die man ja^erleich in den selben Hoff dient an sand Michels tag vnd an sand Cholmans tag vnd daz auch alles vreis aygen ist. Vnd dient derselben Gu^elt Hanns der Egendorffa^er von seinem Hoff ze Slikestorff ain phunt vier phennig vier meczen habern. Czwo Gens. Vier Hu^ener. Vier Ches vnd Sechczik Ayr. Dy Herren von Lambach dient von Achkern Newn schilling vnd achthalben phennig. Vnd dy Herren von Perchtolczgaden habent gedient von irem Hoff ze Gru^entdorff Sechs schilling sechs phennig vnd ainen halben Mu^et Choren drey meczen habern, anderthalbew Gans. drew Hu^ener. drey Ches. fu^enf vnd vierczig ayr. Vnd NiclaVischa^er von der Mu^el ze Sitendorf Ayndlef schilling vnd von aym Holcz in dem Werd ze Tw^enaw^e ain halb phunt phennig vnd von ainem Jeuch achker acht phennig. Vnd der ander Gelt leit auf dem Dorff vnd auf vberlend da selbs ze Strayczesdorf. ze veld. ze dorff. in der pharr ze Hayczendorff oder wo daz gelegen ist alz daz dy Register wol bebeisent dy dar vber sagent vnd mit allew dew vnd dar zu gehort ze veld. ze dorff. Holcz. Wayd. Wismad. Vischwayd. Weingarten. achker. oder wie daz genant ist auzgenomen dy Gu^elt vnd Dienst dy auf dem Hoff ze Gru^entdorff mit aller seiner zu gehorung gelegent sind, dy weilent ee dy Herren von Perchtolczgadem inne gehabt habent vnd nv^e Hainreichs von Spitz Salig Chind vnd Erben inne habent dieselben obgenanten Gu^elt vnd dienst haben wir ausczogen in solcher weis daz der Hoff furbaz in daz Gut nicht mer dient dann fu^enfczehen phennig Pu^erchrechts. Die obgenant Gu^elt vnd dienst haben wir recht vnd redleich verchauft vnd ze Chauffen geben dem Erwirdigen Geistleichen Herren Brobst Jacoben dacz Herczogenwuerch vnd seinem Couent da selbs Vmb czway hundert phunt vnd vmb achczik phunt wienner phennig dy er vmb sein aygenhafcz wol ersparcz gut chauft hat, Vnd der wir von ym gancz vnd gar gericht vnd gewert sein, also daz sew furbaz mit dem vorgenanten Hoff vnd Dorff vnd mit allew dew vnd vorbenant ist, allen iren fru^emb vnd nu^ecz schulln vnd Mu^egen schaffen verseczen verchauffen vnd geben wem si wellent wie in daz aller pest wol fuegt. Vnd sein auch wir vnd all vnser Erben der vorgenanten Gueter irr recht gewer vnd scherm fu^er all ansprach. , . . Auch ist ze merchen daz wir dem Egenanten Geistleichen Herren vnd seinem Conuent all vnser vnd der vorgenanten Erben brief vnd Register dy hie nach ein ander benant sind all haben in ge antwurt von erst vnsern chaufbrief. der dem vorgenanten vnserm lieben vrewnt Hainreichen von Spitz vnd seinen Erben sagt. Vnd dez Bischolfs von Regenspu^erch erlaub brief vnd auch den brieff der dy recht sagt vber dy Gueter in solicher beschaiden wenn sew vns oder vnser Erben vmb den scherm ansprechent oder an rueffent in welcher lay weis daz wa^er oder wie sich daz fuegt daz wir oder sew an geruert vnd an gesprochen wu^erden von wem daz wa^er so schullen sew vns dy selben obgenanten brief her wider antwu^erten vnd wider geben alz lang vnz wir vns vnd sew schirmen vnd webarn. Wer aber daz daz sew dez wider warn, vnd vns der brief nicht in antwu^ertaten vnd gaben so sei wir in furbaz chains scherms noch fu^erstantz noch schadens nymer schuldig noch phlichtig vnd ob sew vns dar vmb ansprachen oder an ru^erten dez sei wir in allen rechten vnd mit allen sachen ledig vnd vnenkolten. Vnd daz der chauff vnd die red also stat sei vnd fu^erbaz gancz vnd vnczebrochen beleib dar vber so geb wir dem vorgenanten Geistleichen Herren Brobst lacobn vnd seinem Couent den offen brief zu ainem warn sichtigen vrchund der sach versigelten mit vnsern obgenanten Hansen dez Hu^elber vnd Iacobs dez Hulber anhangunden insigel vnd dar zu^e haben wir vleizzichleich gepeten die Erbern vnsern lieben Swager Wolfharten von Aw^e vnd Pauln den Hantschu^esta^er dy zeit Hofmaista^er in Ga^erstna^er Hoff ze Chrems daz sew der sach zeug sind mit iren anhangunden insigeln in peden an schaden. Der brieff ist geben nach Christi gepu^erd drewczehen hundert iar vnd dar nach in dem Newnczkisten iar dez Erichtags vor vnser vrawn tag in der Vasten.

Source Fulltext: FAIGL, Herzogenburg (Wien 1886) S. 329-332