ICH Aram Jud Muscheins Sun von Gran mein Hausfraw vnd all vnser erben wir veriehen vnd tuen kundt offenleich mit dem brief allen lewten gegenburtigen vnd ku^enftigen von des Lehens wegen das gelegen ist zu^e Oberndorf vnd gewesen ist fridleins pinter daselbs vnd das mir verstanden ist von ym das hab ich abzelo^esen geben den Erwirdigen gaystleichen herren dem Connuentt zu^e herczogenburg vnd des diezeit amptman gewesen ist der Erber gaystlich herr her Erhart der ffrel auf ir Oblay vmb ainn gelt des wir gancz vnd gar bericht vnd beczalt sein ffu^erbas mit dem vorgenanten Lehen mu^egen die vorgenanten gaystleichen herrn allen iren frum damit schaffen wye in das aller pest fuegt Ich vorgenanter Aram Jud mein Hausfraw vnd all vnser erben Sagen das vorgenant guet ledig vnd las das wir darzu^e nymermer ze sprechen haben nach sullen weder wenig nach vil wir sein lembtig oder tad. Vnd des zu^e ainer v^erkundt Geben wir ich vorgenanter Aram der Jud Mein hausfraw vnd all vnser erben den egenanten Erwirdigen gaystleichen herrn dem Conuentt zu^e herczogenburg den brief Besigelten mit des erbern Andren des Chunter diezeit juden richter zu^e herczogenburg anhangunden Insigel den wir daruber vleyzzickleich gepeten haben vnd darunder wir vns verpinden mit vnsern trewn an aydes stat vnd angeuer alles das stet zu haben das vor oben an dem brief geschriben stet. wann wir diezeit aygen insigel nicht gehabt haben So haben wir dazu^e vleyzzikleich gepeten den erbern vlreichen den Lyst purger daselbs das er der Sach zeuge ist mit seinem anhangunden Insigeln in baiden vnd allen iren erben an schaden Geben nach Christi gepuerd vierczehenhundert jar vnd darnach in dem Sybenten jar an Mitichen nach Sannd Alexii tag.

Source Fulltext: FAIGL, Herzogenburg (Wien 1886) S. 363-364