ICH Niclas der Dristell vergich offenleich mit dem briff fu^er mich vnd all mein Erben vnd miterben vnuerschaidenleich vnd tu^e chund allen lewten gegenburtigen vnd chunftigen vmb alle de zuspruch mizhelung vnd voderung So ich von meinen wegen, meiner erben vnd miterben gehabt hab hintz den Erbirdigen geistleichen herren herren Johannsen Brobst zu Gorigen goczhaus zu hertzogenburg vnd dem gantzen Capitell daselbs von ains hofs wegen der gelegen ist ze Portschalich In reidniker pharr der weiland gewesen ist Niclas des Pu^echler Kathrein seiner hausfrawn vnd Anna Mathesen von Ha^ederstorff seligen tochter mit aller seiner zu^egeho^erung ze veld vnd ze dorff nichtz darinn hindan gesatzt vnd fu^er de selben zu^espruch vnd vodrung, vns de vorgenanten herren ein beraite sum geltz gegeben habent doran vns wol genu^egt hat vnd der wir gancz vnd gar von in betzallt sein warden, vnd mu^egen vnd schullen mit dem eegenanten hoff vnd mit aller seiner zu^egeho^erung allen iren frum schaffen niezzen nuczen verseczen verchawfen geben oder machen wem si wellen an allen irsall wii in daz allerpesst chumpt vnd fugt mit vnserm gu^etleichen willn wan wir vns des vorgenanten hoffs mit seiner zu^egeho^erung genczleich verczeichen mit chraft des brifs vnd hinfu^er hintz dem Eegenanten herren herren Johannsen dem Brobst zu Hertzogenburg dem gantzen Capitell vnd allen iren gu^eth de zu demselben gotzhaus geho^erent chain zuspruch voderung nymmer haben schulln noch welln vmb vil nach vmb wenig weder mit recht noch an recht in chainerlay weis noch nimand von vnsern wegen wer awer daz wir des nicht sta^et hilden vnd daz vbertreten mit red oder mit werich wii sich daz von vnsern wegen erhub So schulln wir dem der de zeit Landmarschalich ist In Osterreich leibs vnd guts verfallen sein an alle genad vnd rechtens darczu^e, vnd schulln wir auch vmb de vorgeschriben pu^ent vnd sach alle chain freyung nach rettung in chainer herrschafft nicht enhaben noch geniezzen Inner landes noch auzzerlands wo wir hincho^emen mit warem vrkund dez briffs den ich vorgenanter Niclas Dristell gib fu^er mich all mein erben vnd miterben vnuerschaidenleich den vorgenanten Erwirdigen geistleichen herren herren Johannsen Brobst zu Herczogenburg vnd dem ganczen Capitell daselbs vnd wann ich vorgenanter Niclas Dristell de zeit nicht aigen Insigil enhab So hab ich fleizzichleich gepeten den Erbern Edlen meinen lieben herren herren Lewpolten von Wa^ehing daz er den brieff an meiner stat mit seinem anhangunden Insigell besta^ett hat vnd zu ainer pessern sieherhait So hab ich fleizzleich gepeten den Erbern Johannsen den aigner de zeit phleger zu dem Sitzenperig daz er der sach gezeug ist mit seinem anhangunden Insigell In paiden an schaden vnd irn Erben vnd dar vnder ich mich vnd fu^er all mein Erben vnd mit Erben verpind an aydes stat alles das stet ze haben alls oben an dem briff geschriben stet. Geben nach cristi gepurd vierczehenhundert Iar darnach in dem dreuczehenten Iar An dem Sunnbennt Obent.

Source Fulltext: FAIGL, Herzogenburg (Wien 1886) S. 368-369