UNIUERSIS et singulis Christi fidelibus presentes litteras visuris et audituris Nos miseracione diuina Johannes tt. sancti Petri ad Vincula dictus Vlixbonensis presbiter, Landulphus sancti Nicolai in Carcere tulliano dictus Barensis, Petrus sancti Angeli. Necnon Lucidus sancte Marie virginis in Cosmedin dictus de Comitibus. Diaconi. sacrosante Romane ecclesie Cardinales Salutem in domino sempiternam. Omnipotens et misericors deus qui celestia pariter et terrena ordinat et disponit ministros suos et cultores christianos altis decorando honoribus et saluando thesauris preciosissimis deuocionem ipsorum quasi quibusdam alliciendo muneribus ut eos efficiat celestis patrie possessores inuitare consueuit per sua dona gratias et munera ad debiti famulatus dei et sanctorum eius honorem de cuius dulcedine egris medicina languentibus solamen reis culpe remedium et cunctis ipsius patrocinium implorantibus misericordie riuulus noscitur emanare. Cupientes igitur ut ecclesia Monasterii in hersogenburgo ordinis sancti Augustini Patauiensis diocesis in honore et sub uocabulo sancti Georgn militis et martiris dedicata congruis honoribus frequentetur et a Christi fidelibus iugiter veneretur et ut fideles ipsi eo libencius causa deuocionis oracionis aut peregrinacionis confluant ad eandem ac ad ipsius sustentacionem et conseruacionem manus promptius porrigant adiutrices quo ex hoc ibidem dono celestis gracie vberius conspexerint se refectos De omnipotentis dei misericordia et beatorum Petri et Pauli Apostolorum eius auctoritate confisi Omnibus vere penitentibus confessis et contritis qui ipsam ecclesiam in sancti Georgii eius Patroni ac ipsius dedicacionis festis nec non in omnibus et singulis festis infra scriptis utpote Natiuitatis domini nostri Ihesu Christi Circumcisionis Epiphanie Parasceues Pasce Ascensionis Penthecostes Trinitatis Corporis Christi Inuentionis et exaltacionis sancte Crucis In omnibus et singulis festiuitatibus gloriosissime virginis Marie In festis sancti Johannis Baptiste sancti Johannis ewangeliste Petri et Pauli et Omnium Apostolorum et ewangelistarum Sanctorum Stephani Laurencii Vincencii Gregorii Augustini Benedicti Martini Nicolai. Sanctarum Marie Magdalene Margarethe Dorothee Barbare Katharine et Lucie virginum In celebritate onmium Sanctorum et Commemoracione animarum et per Octauas dictarum festiuitatum octauas habencium, singulisque Sabbatinis diebus quibus ex speciali deuocione ob reuerenciam dei et gloriosissime virginis Marie eius genitricis ad ipsam ecclesiam populi confluit multitudo non modica deuote uisitauerint, nec non missis matutinis vesperis et predicacionibus in dictis festis et presertim Sabbatinis diebus prefatis cantacioni Antiphone Salue regina mater misericordie etc. circa Cimiterium ipsius ecclesie ante ymaginem virginis Marie deuote interfuerint nec non in serotina pulsacione secundum modum Curie Romane genibus flexis ter Aue maria dixerint. Quique ipsam ecclesiam uel eius Cimiterium pro fidelium defunctorum in ipsis ecclesia Cimiterio sepultorum animabus deum pie exorando circuierint Et qui ad ipsius ecclesie fabricam ornamenta luminaria uel queuis alia ipsi ecclesie necessaria manus porrexerint adiutrices uel qui in eorum Testamentis uel extra prefate ecclesie pro ipsius sustentacione et in esse conseruacione Aurum argentum vestimentum census redditus uel prouentus aut aliquod aliud caritatiuum subsidium donauerint legauerint uel procurauerint Quocienscunque quandocunque uel vbicunque premissa, uel premissorum aliquod deuote egerint singuli nostrum Cardinalium Centum dies Indulgenciarum de iniunctis eis penitenciis misericorditer in domino relaxamus Presentibus perpetuis temporibus duraturis. In quorum omnium et singulorum fidem et testimonium premissorum presentes nostras literas propriorum nostrorum sigillorum iussimus appensione communiri. Datum Rome Sub anno a natiuitate domini Millesimo Quadringentesimo tercio decimo Indiccione Sexta die Octava mensis Aprilis. Pontificatus sanctissimi in Christo patris et domini nostri domini Johannis diuina prouidencia pape vicesimi tercii Anno Tercio. Et nos Georgius dei et apostolice Sedis gracia Episcopus Patauiensis Alme Strigoniensis Ecclesie Administrator nec non Romane Regie Maiestatis Cancellarius supremus, Omnes et singulas indulgencias a supradictis Reuerendissimis in Christo patribus et dominis dominis quantumcunque prouide datas et concessas ratas et gratas habentes, ipsasque auctoritate nostra ordinaria in dei nomine approbamus et ratificamus ac robur tenere volumus perpetue firmitatis, Addicientes (sic) eciam auctoritate nostra predicta. Quadraginta dies Indulgenciarum perpetuis temporibus duraturas harum sub appensione Sigilli nostri testimonio literarum. Datum in Ciuitate nostra Mautam XXVII. Mensis Maii Anno domini Millesimo Quadringentesimovigesimo secundo.

Source Fulltext: FAIGL, Herzogenburg (Wien 1886) S. 366-368