ICH vlreich vnd ich Erhart gebruder miteinander Hannsen des froeschleins Sven von hertzogenburg vnd Ich Michel ir bruder vaterhalben Wir vergehen mit dem offenn briff vnd tu^en kund allen den er fürchumpt lebentigen vnd ku^enftigen daz wir mit wolbedachtem mut zw der tzeit da wir ez rechtleich getun mochten Recht vnd redleich verchaufft haben vnd abtzelo^esen geben haben all zwspru^ech vordrung vnd wartung vnd eribtails So wir ytz gehabt haben vnd hinfu^er gewunen hieten von abgang mit dem tod vnsers liben Vaters Hannsen des fro^eschlein hintz ainem haus daz gelegen ist da ze herczogenburg auf der widem zwischen lannsen des schuster vnd vetern des Ku^ersner hawsern, da von man Jerleich dint dem Erwirdigen geistleichen herren herren Johannsen Brobst zw hertzogenburg vnd seinen nachkomen zwen wienner phennig an Sand Philipps tag vier auf vach phennig ain faschang hu^en vnd nicht mer. Das vorgeschriben haus mit allen seinen eren vnd rechten alls es vnser vater seliger inngehalden hat alls vil vns vnser eriben ytzund vnd auch hinfür an rechtem eribtail gevallen scholt sein die haben wir ze chauffen geben vnserr liben Stefmuter,frawn Elizabethen Jannseins des froschlein witiben vnd allen iren eriben vmb vierdhalb phunt phennig der wir gancz vnd gar gewert sein worden ze rechten tagen an allen vnsern schaden. In der beschaidenhait, das die vorgenant fraw Elizabeth vnser Stefmuter vnd ir eriben nu^e hinfu^er mit dem vorgenanten haus mugen vnd schullen allen iren frum schaffen mit verchauffenn mit versetzen Schaffen machen vnd geben wem Sy wellen an all vnser vnd vnser eriben irrung wie in das am fu^egleichisten ist wann wir vns des vorbenanten hausz gancz vnd gar vertzeihen vnd da engegen nymermer ze sprechen haben noch nymand von vnsern wegen weder mit recht noch an recht In chainerlay weys vmb vil noch vmb wenig Auch sein wir drey bruder vnd all vnser eriben der vorgenanten fravn Elizabeth vnser Stefmuter vnd iren nachsten eriben des vorgenanten hausz Recht gewern Scherm vnd fürstand für all ansprach. . . . Vnd des ze vrkund Geben wir ir den briff Besigelt mit gruntherren Insigell des Erwirdigen geistleichen herren herren Johannsen Brobst ze herczogenburg anhangundem Insigel den wir darvmb fleyzzich gepeten haben. Geben nach Cristi gepurd Tausent Iar vierhundert Iar darnach in dem Achtzehendem Iar an Sand Gregorii Tag.

Source Fulltext: FAIGL, Herzogenburg (Wien 1886) S. 385-387