ICH Christoff Seebekch Beatrix mein Hawsfraw vnd all vnser Erben wir veriehen vnd tun chunt offenleich mit dem brieff allen Lewten die den brieff lesent sehent oder horent lesen die nu^e lebent oder hernach chunftig sind das wir . . . Recht vnd redleich verchaufft vnd zu chauffen geben haben dem Erwirdigen Geistleichen hern hern Johannsen die zeit Brobst zu Herczogenburgk vnd dem ganczen chonuent daselbs Syben phvnt geltz die gelegen sind zu Ernberg auf czwain behausten holden vnd die czeit darauf gesessen sind Ist der ain genant vlreich Seidl vnd dint fu^enf phvnd wienner phennig der swarczen Mu^ens drew phvnd auf Sand Michels tag vnd czway phvnd auf Sand Katrein tag Item der ander haist Hanns Po^eriger vnd dint czway phvnd wienner phennig auch der swarczen Mu^ens ain phvnd auf Sand Michels tag vnd ains auf Sand Katrein tag vnd nit mer. Vnd das haben wir also verchauft vnd zu chauffen geben vmb ain Svmm geltz dar an vns wol genu^egt vnd der wir von in gancz vnd gar verricht vnd gewert sein an all Scha^eden zu^e rechten ta^egen Also das Sy hinfür mit den obgenanten gu^etern allen iren frumen damit mugen Schaffen mit versetzen mit verchauffen Schaffen machen vnd geben wem Si wellent an all vnser vnd Ma^enicleichen irrung wir Seinn auch Ich obgenanter christoff Seebekch Beatrix mein hawsfraw vnd all vnser erben der obgenanten Siben phvnt geltz des obgenanten herrn Johannsen Brobst zu herczogenburgk vnd des ganczen chouent da selbs irr rechter gewer Scherm vnd fu^erstant fu^er all anspru^ech als soligs freis aigens geltz recht ist vnd des Landes recht in Osterreich. . . . vnd daruber So geben wir Ich obgenanter Christoff Sebekch Beatrix mein havsfraw vnd all vnser erben dem vorgenanten herrn Johannsen Brobst zu herczogenburkch vnd dem ganczen chouent da selbs den brieff besiglt mit meim anhangunden Insigel vnd zu pesser sieherhait willen da mit das der vorgenant chauff sta^et vnd vnczebrochen peleib haben wir mit vleiss gepeten den Edlen wenczla Inprukcher vnd den Edlen wolfgang den Schauchinger dazz sew der sach auch zeug sind mit irn anhangunden Insigeln In vnd iren Erben an schaden. Der brieff ist geben nach christi gepurd vierczehenhundert iar darnach in dem vier vnd zwainczigistem iar an Mantag vor der heiligen dreir chunig tag.

Source Fulltext: FAIGL, Herzogenburg (Wien 1886) S. 398-399