Wir Leonard von Gotes gnaden Bischoue ze Passaw Bekennen Als der Ersame vnser lieber in Gote Hanns Brobst Peter Techant vnd gemeinklichen das ganncz Capittl des Closters ze Herczogenburg, vnsers Bistumbs durch Ir Anwa^elde vnd verweser mit volligem gewalt an ainem vnd Larenczen Capplan vnser frawn Cappeln zu Hewnn gelegen vnd der Erbern Breiden weilent des pebringer seligen witibe an stat Hannsen vnd Wilhalms der pebringer Irer Su^en den die lehenschaft derselben Cappeln zugeho^eret an dem anndern tayle, von aller zwayung vnd missehelung, so zwischen In sind, von pfarrlicher Rechten wegen, der sich der benannt Larencz zu derselben seiner Cappeln vnderczogen hate, zu schaden der pfarrkirchen zu Herczogenburg, ledigklich vnd plo^eslich hinder vns geganngen sind, daz wir Sy darumbe entschaiden, mit vnserm ausspruch, vnd was wir sprechen werden, daz dabey yettweder tayl beleiben sol an alles widerruffen vnd waigrung vngeuerlich Sprechen wir von erste die obgenannten tayle zu guten freunden vnd gu^ennern, vnd daz yettweder tayl dem anndern nu hinfu^er lieb vnd freuntschaft erzaigen sol Item darnach sprechen wir, daz der obgenant Capplan ze Hewnn den Gotsdienst daselbs begeen sol, in masse als er In danne vorher beganngen hat, mit Messen, den Suntag mit predigen kundung der heiligen zeit, vnd mit gedencken der Seele, vnd das sol er tun nach erlaubung vnd verhengnusse des vorgenanten Brobstes vnd seines Capitls, den die benannt pfarrkirchen ze Herczogenburg eingeleibt ist, darinne dann dieselbe Cappeln zu Hewnn liget, Sunder sol der benannt Capplan nyemandt da begraben, noch der selben Sibentten, dreissigisten, vnd Iartag aufnemen Sunder die an Im pfarrer schicken da Sy hin geho^erent auch peichtho^eren noch anndrew pfarrliche Rechte begeen in dhain weise Es mugen vnd sullen auch die Krewcz, die dann von allter an ettlichen ta^egen zu der benannten Cappeln geganngen sind, desselben gannges von dem vorgenanten Brobst vnd seinem Capitl vngehindert beleiben Auch sprechen wir daz zu den Hochczeitlichen tegen, als zu den weinachten, Liechtmessen, Ostern, Pfingsten, Kirchweichen vnd sannd Stephan, vnd sannd Io^ergen tag, Patronen der obigen Pfarrkirchen ze Herczogenburg, die Pfarrleu^ete daselbst hin geho^erent zu derselben Irer Pfarrkirchen geen vnd die haimsu^echen sullen als danne kristenlich ist Sunderlich zu den Ostern da Ire kristenliche recht tu^en nemen vnd emphahen vnd ob die benanntew Kappeln also aufneme vnd erho^ehet wurde nach solhem gemaynnem lauf als dann darczu ist, behallden wir vns oder vnsern nachkomen, das ze entschaiden, was der obgenannten Pfarrkirchen darumbe ze widerlegung beschehen sulle Auch sprechen wir welher vorgenanten tayle den obgenannten vnsern Spruch v^eberfare vnd den nicht hielde in ainem Artikel oder mere, wye sich das fugte, der sol vns vnd vnsern nachko^emen fu^emfczigpfuntpfennyng vnd zu dem Paw ze Passaw, auch als vil, vnla^eslich schuldig sein zu bezalen. Mit vrkunt dits briefs. Geben ze sannd Poelten an Montag nach Gotes Leichnam tag Nach Kristi gepurde Im vierczehenhunderten vnd dreissigisten Iare.

Source Fulltext: FAIGL, Herzogenburg (Wien 1886) S. 409-410