ICH Haidenreich von Plannkenstain vnd Ich Pernhart von Ror, Bekennen vmb all die stoss, vnd zwitrecht, So wir gehabt haben mit dem Erwirdigen geistleichen herren hern Johannsen Brobst zu Herczogenburg vnd dem ganczen Conuennt daselbs, von wegen des Iartags, den her weikart von Retelperg In Ir Gotzhaws zu Herczogenburg gestifft hat mit zwain pfunten wienner pfennig gelts, die man lerleich dint zu sand Michels tag, vnd die gelegen sind auf vberlennt zu Retlperg vierczehen schilling drey vnd zwainczig pfennig das da haist auf der wis vnd Siben vnd dreissig pfennig auf gerten gelegen vmb das haws zu Retlperig Nach Innhaltung des briefs so der obgenant Brobst vnd sein Conuent von dem vorgenanten von Retelperig daruber habent. Nun haben wir obgenant Haidenreich von Plankennstain vnd Pernhart von Ror die vorbenanten zway pfunt gelts, ettleiche Iar ingenomen, vnd mainen Sy haben den egenanten Iartag nicht vollikchleich begangen, So maynn Sy Sy haben es getan, Der vorgenanten stoss vnd zwitrecht sey wir zu baiderseit hindergengig warden vnd gen auch wissentleich In krafft des briefs hinder den Erwirdigen vnd geistleichen herren hern Cristan Brobst zu sand Polten vnd was der darumb zwischen vnser baiden tailln spricht das wir das genczleich war vnd stet sullen vnd wellen halten getrewleich vnd vngeuerleich, Der hat gesprochen von erst, das wir obgenant von Plannkenstain vnd Pernhart von Ror, der obgenanten zwayr pfunt gelts abtreten vnd Inantwurten sulln dem egenanten Brobst zu Herczogenburg vnd seinem Conuennt anuercziehen, vnd sullen Sew hinfür daran vngewert lassen, Sy sullen auch die vorgemelten zway pfunt gelts Stifften vnd storn an vns vnd vnser erben Irrung. Wenn was vber zins vber die zway pfunt auf den obgenanten gutern ligent, die sulln wir egemelt Haidenreich von Plannkenstain vnd Pernhart von Ror vnd vnser erben Innemen an des yeczgenanten Brobst vnd seins Conuennt vnd irer nachkomen Irrung, Er hat auch gesprochen, wann wir Ich offgenanter von Plannkchenstain, vnd Ich Pernhart von Ror oder vnser erben die obgenanten zway pfunt gelts wider wellen haben So sulln wir oder vnser erben dem obgenanten Brobst vnd seinen nachkomen, zway pfunt aigens gelts ausczaigen vnd dafür geben damit Sy vnd ir nachkomen benugig werden vnd an gelegen steten, hiedishalb der Tu^enaw zwischen wienn vnd ybs Sy sullen auch mit den gutern darauf die zway pfunt gelts ligndt hanndeln als mit anderm irm aigen gut vnd sullen In das mit briefen wol versorgen, Er hat auch gesprochen das der vorgenant Brobst zu Herczogenburg der gancz Conuennt daselbs vnd Ir nachkomen dem vorgenanten von Retelperig vnd seiner hausfrawn. ainen ewigen Iartag begen sulln alle Iar des Suntags nach sand Barbaren tag, des nachts mit ainer gesungen vigili mit Newn leczen vnd des margns mit ainem gesungen selambt vnd ain Ambt von vnser lieben frawn schidung vnd vnder den zwain ambtn zwo mess gesprochen vnd vmb die sei vnd all gelawbig sel pitten auf dem letter vnd mit zwelif prinnenden kerczen die pey der par prinnen sulln des nachts pey der vigili des margns pey den zwain ambtn vnd messen vncz das der Goczdinst gancz volbracht wirdt Er hat auch gesprochen welhes Jars Sy das nicht teten vnd den egenanten Goczdinst nicht genczleich volfu^erten So vor geschriben stet So sullen wir vns vorgenant von Plankenstain vnd von Ror oder vnser erben Sich der vorgenanten zwayr pfunt gelts wider vnderwinden, vnd So lanng Innhaben vncz das der versawmbt Goczdinst von In gancz volbracht wirdt, vnd dann In Ir zway pfunt gelts Inantwurttn vnd was wir der Ingenomen haben auch Inantwurtten angeuerd Er hat auch gesprochen vmb das Innemen So wir getan haben, vnd vmb das versawmbn des Goczdinsts den Sy versawmet haben als wir maynn, das es sol sten zu baiderseit mit vnser gewissen Er hat auch gesprochen, welher tail des spruchs nicht stethielt So vor geschriben stet der sol gegen seinem widertaill allew seine Recht verlorn haben. Mit vrkund des briefs besigelten mit vnser offgenanten Haidenreichen von Plannkenstain vnd Pernharten von Ror baider anhangunden Insigeln. Der sach sind geczewg durch vnser fleissigen pet willen die Erbern, knecht Michel Gawbicz vnd Peter Cholinger auch mit Irn anhangunden Insigeln In vnd irn erben an schaden. Geben nach Kristi gepurd vierczehenhundert Iar, vnd darnach In dem drey vnd dreissigistem Iare An sand Augustins tag des heiligen Bischoff.

Source Fulltext: FAIGL, Herzogenburg (Wien 1886) S. 419-421