IN nomine domini. Amen. Quia enim vita hominum velud nuncius precurrens. et tanquam vmbra velociter transit. ita ut homo iam floridus et amenus in ictu oculi velud lanugo que flatu venti tollitur. et tanquam fumus diffusus in aera in nichilum redigatur. nec tunc sciri possit quis nostrum dignus sit odio uel amore Idcirco super omnia expedire dinoscitur ut viri spiritales. qui solum querere debent que sursum sunt non que super terram. decurrencia vite sue tempora sic prevideant, sic disponant. ut labore suo sic transitorio quietem perpetuam valeant emercari. Ad quod vtique fiendumnichil adeo credimus profuturum. quam ut fusis pro inuicem piis obsecracionibus. placabilem sibi reddant supernum iudicem. qui in ira misericordie recordatur. Si enim secundum statum exterioris hominis. qui sibimet quodammodo parare potest aminiculum in caritate iubemur invicem documentis apostolicis supportare videtur oportunius et saluti multo congruencius ut interior noster homo qui disiunctus a corpore nichil sibi prodesse poterit. cum iam extra merendi statum existat. bonorum operum exerciciis et caritatiuis oracionum suffragiis adiuuetur. quibus se subsidiis a penalibus exspectat releuari. Proinde nos Johannes Prepositus totusque Conuentus Monasterii beate Marie virginis In Tirnstain ordinis Sancti Augustini canonicorum regularium Patauiensis diocesis iuxta dicta animarum volentes procurare salutem matura deliberacione prehabita fraternitatem contrahimus. seu contractam tenore presencium roboramus cum venerabilibus patribus et dominis. fratribus nostris. Reuerendo scilicet in Christo patre domino Johanne preposito totoque conuentu. Monasterii Sancti Georii in Herczogenburga. decernentes. ut prefati domini et fratres nostri participes sint in vita pariter et in morte missarum oracionum abstinenciarum vigiliarum elemosinarum omniumque bonorum que in nostra prenominata domo. videlicet in Tirnstain per presentes et posteros nostros. divina dignabitur clemencia operari. Addicientes insuper. quod cum fratris vnius professi uel plurium de dicto Monasterio in Herczogenburga dies obitus nobis fuerit intimatus Psalmos verba mea in capitulo vigilias maiores lectas et missam pro defunctis subnota cum commendacione singulisque aliis iuxta morem nostrum ac ordinis conswetudinem persoluemus. Consequenter quilibet sacerdotum. ipso uel alio die leget vnam missam dyacones vero subdyaconi accoliti et ceteri clerici vnam quinquagenam psalmorum et fratres conuersi Centum oraciones dominicas cum tottidem Aue maria dicere tenebuntur Nominaque ipsorum fratrum defunctorum nostris annalibus mortuorum libris ascribemus. Quod eciam per vos pro nobis et nostris successoribus fieri speramus. In premissorum omnium testimonium Sigilla nostri prenominati Prepositi et Conuentus duximus presentibus appendenda. Datum in predicto nostro Monasterio in Tiernstain Anno domini M° CCCC° XXXII decimo Kalendas Marci.

Source Fulltext: FAIGL, Herzogenburg (Wien 1886) S. 417-418