Wir Johanns von gots genaden Brobst zu Herczogenburg vnd der gancz Conuent daselbs Bekenn für vns vnd all vnser nachkomen von des hauss wegen gelegn zu wenign Russt, das weylent der Saurpir gewesen ist, Da von man vns vnserm Gotshaus ierleich gedint hat an sand Michels tag, viervndczwainczig pfennig zu gruntdinst, Dasselb haws mit sampt seiner zu^egeho^erung haben wir nu^e geliehen in purkchrecht weys dem beschayden mann Petern dem Offner Amptman zu Russt Agnesn seiner hausfrawn vnd allen irn erben In solher weschaiden vnd mit ausgenomen warten also das sew oder wer das haus nach in Innhat oder wesiczt vns vnd vnserm gotshaus hinfu^er alle iar ierleich davon Raichen vnd dienen schullen an sannd Michels tag Sechczig wyenner pfennig zu rechtem Purkchrecht vnd nicht mer. Es ist auch ze merkchen das wir haben ausgenomen das vns der obgenannt Peter Offner vnd sein hausfraw oder wer das haws nach in Innhat vns vnsern getrayd dinst zu Russt in dem haws schullen lassen Innemen vnd vechsen an alle irrung Als wir den von alter dar In ingenomen vnd gevechsend haben Sy mu^egen auch das obgenannt haus mit seiner zu^egehorung vnd mit den egemelten Sechczig pfennig purkrecht dinst vnd mit vnsenn ausgenomen rechten, als vor geschriben stet verkchauffen verseczen vnd alles das damit hanndeln als mit anderm irem purkchrecht vngeuerlich. Mit vrkund des brieffs wesigelt mit vnserm chlainen anhangunden Insigl. Geben zu Herczognburg Nach christ gepurd vierczechenhundert Iar vnd darnach in dem fu^enf vnd dreissigistem Iar an der heyligen drey Ku^enig tag.

Source Fulltext: FAIGL, Herzogenburg (Wien 1886) S. 423