IN nomine domini. Amen. Venerabili in Christo patri ac domino. domino Johanni Preposito nec non Venerabilibus et Religiosis viris ac dominis Decano Totique Conuentui Monasterii Sancti Georii martiris in Herczoenburga. Ordinis Sancti Augustini Canonicorum Regularium patauiensis diocesis. Caspar Prepositus Wolfgangus Decanus Totusque Conuentus Monasterii Sancti ffloriani Martiris prope Anesum Ordinis et diocesis predictorum. Post condignam recommendacionem. cum oracionum incremento. sinceram in domino caritatem. Cum iuxta doctrinam Beati Jacobi Apostoli in sua Epistola clerum instruentis orare debeamus pro inuicem ut saluemur vt opere et veritate se longe lateque diffundat dilectio karitatis. hinc est quod maxime Religiosi singularis dilectionis foedere advnati pervigili cura semper intendere debent, vt qui nexu amoris hic fideliter coniunguntur solutis corporibus eciam in spiritu feliciter congregentur. Idcirco nos secundum aliorum ordinum consuetudinem ad vnionem nostre fraterne fidei vestras Reuerendas et multum Venerandas dilectiones ac cuiuslibet vestrum sinceriter recipimus decernentes vobis cunctisque vestris succes soribus tam in vita quam in morte plenum dare participium omnium que cottidie domino deo omnipotenti sua gracia cooperante exhibemus in diuinis seruiciis. in sancta Missa. et deuotis oracionibus. in vigiliis. In jejuniis et aliis piis laboribus et exerciciis ac generaliter cunctarum piarum accionum. quas per nos et posteros nostros. ex nunc in antea operata fuerit clemencia Saluatoris. hiis nichilominus adicientes vt cum fratris vnius professi uel plurium de dicto Monasterio Sancti Georgii martiris In Herczo^enburga obitus nobis fuerit intimatus. vigilias maiores. Missam sub nota iuxta ritum nostri Monasterii persoluemus pro anime defuncti remedio salutari. Consequenter quilibet Sacerdotum ipso uel alio die leget vnam missam non Sacerdos vero vnum Placebo. et fratres Conuersi triginta Pater noster. cum totidem Salutacionibus Angelicis dicere tenebuntur. Nomenque ipsius defuncti nostris annalibus mortuorum libris annotabimus. In huius ergo fraterne vnionis perpetuo valiture euidens testimonium. presentes litteras vestre tradimus caritati. Sigillorum nostrorum appensionis munimine roboratas. Datum in prenominato Monasterio nostro Anno domini Millesimo Quadringentesimo tricesimo quinto Dominica prima in Aduentu domini Saluatoris nostri Ihesu Cristi.

Source Fulltext: FAIGL, Herzogenburg (Wien 1886) S. 428-429