Wir Johanns Brobst Sannd Jorign Goczhaus zu Herczogenburkch Bekennen offenleich mit dem brieff das wir gekauft haben von Elspeten fridreichs in der Hueb seligen witib zu Etterding halbew Muel mit seiner (sic) zuegeho^erung gelegen niderhalb fridreichs des Perner Muel zu Herczogenburkch vnd hayst der Sydlhoff vmb ain Sum gelts der Sew von vns gewert vnd beczalt sind nach ausweysung Irs kaufbriefs den wir von In darvmb haben Auch hab wir den andern halben tail mit seiner zugeho^erung gekauft von Peter dem Muelner am Sydlhof vnd Elspetn seiner hausfrawn vnd Ir payder eriben auch vmb ain Sum gelts der sew von vns beczalt sind zu rechten ta^egn vnd daran sew wol genugt hat die selb gancz Mu^el hab wir verkauft vnd zu kauffen geben dem yezgenanten Peter Mu^elner vnd Elspetn seiner hausfrawn vnd Irn payden eriben vmb ain Sum gelts der wir gancz vnd gar ausgericht vnd beczalt seinn zu Rechten ta^egn vnd davon man vns vnd vnsern nachko^emen la^erleich dint ain phunt phennig halben tayl auf Sannd Io^erign tag vnd halben tayl auf Sannd Michels tag zu rechtem Gruntdinst vnd nicht mer vnd ainn schachen pawm daselbs davon man vns auch vnd vnsern nachko^emen je^arleich dint aynn helbing an sannd lo^erign tag vnd aynn helbing an sannd Michels tag vnd nicht mer Auch haben wir In ze kauffen geben ainn schachen pawm pey dem Judenhoff vnd dint czwen phenning an sannd Po^elten tag Je^arleich in den Judenhoff ze Purkchrecht vnd nicht mer vnd ainn schachen pawm ze Oberndorff der da dint ainn helbing an sannd Michelstag zu purkrecht in des Brobsts Ambt zu sannd Andre an sannd Poltn tag vnd nicht mer Darvmb schullen vnd mu^egen Sy dye yeczgenanten gu^eter allew mit Irrer zuegeho^erung nuczen vnd nyessen vnd allen Irren frum damit geschaffen mit verseczen verkauffen schaffen machen geben wem sew wellent an vnser vnd me^anikleich Irrung vngeuerleich wir seinn auch vnd vnser nachko^emen der yeczgenanten gu^eter Ir rechter gewer Scherm vnd fu^erstand fu^er all ansprach als soleichs gekchaufts gu^ets Scherms recht ist In dem lannd ze O^esterreich. . . . Vnd des zu vrkund geben wir In den offen brieff Besigelt mit vnserm anhangunden Insigel. Auch hab wir vleyssikleich gepeten den erbern weyssen Ekcharte n den pa^elanter purger zu Herczogenburkch das er der sach geczeug ist mit seinem anhangundem Insigel Im vnd sein erben an schaden. Darvnder wir vns mit sambt vnsern nachko^emen verpinden alles das war vnd stet ze haben das oben an dem brieff geschriben stet Der geben ist nach christ gepurd vierczehen Hundert Iar darnach in dem fu^enf vnd dreyssikisten Iar an sannd Symons vnd sannd Judas tag der heyligen czwelifpoten.

Source Fulltext: FAIGL, Herzogenburg (Wien 1886) S. 427-428