Wir Johanns Brobst vnd der Conuent sant loerigen Gotzhawss zw Herczogenburg veriehen fu^er vns vnd fu^er all vnser nachkomen vnd tu^en kund Offennleich mit dem brieff allen den er fu^erchumbt Das wir mit guetem willen vnd mit gemainem verainten Ratt vnd wolbedachtem mu^et zw der zeitt do wir das mit recht wol getu^en machten Recht vnd Redleichen verchawfft vnd ze kawffen gegeben haben dem weschayden Erhart dem Zekkinger Angnesen seiner hawsfrawn vnd Irn payden Eriben Vnser haws mit seiner zwegerung (sic) ze Nwsdorff gelegen zwischen Hannsen des Spiessler vnd Thaman des Gumppn hewsern vnd gehortt darin ain Jewch weingarten in Pewnttn gelegen awserhalb Chirichen vnd ain Pawngarten vnd ain Jewchart akcher das do gelegen ist an drynn endtn vnd ain tagwerich wismad gelegen in der Aw bey dem Erla^ech zwischen Stephan des Engelharten vnd Thaman des Prunner wismadn vnd soll der Egenant Erhart vnd sein Eriben an statt vnsers Gotzhawss zw Herczogenburg von dem obgenanten tagwerich wismad lerleich an sand Michels tag dienen vnd raichen dem Edeln ffridreichen dem Hachstetter vnd sein eriben drey helbling vnd nicht mer vnd sein auch der Sumb gelts darumb wir In das vorgenant Hawss mitt seiner egenanten zwegehorung ze chawffen haben geben von In gancz ausgericht peczalt vnd gewertt zw rechten tagen an allen vnsern schaden Doch in solher peschayden das sew vnd ir eriben vns vnd allen vnsern nachkomen lerleich davon dienen vnd raichen schullen an sand Michels tag drew phunt vnd Sechczig wienner phenig vnd schullen vns auch gewertig vnd gehorsamb sein als ander vnsers Gotzhawss holden. Auch schullen sew oder Ir eriben das vorgenant Hawss mit seiner zwegehorung pawleich vnd stifftleich legen ze veld ze dorff ze weingarten mit sambt dem Pawngarten Auch mugen sew vnd Ir eriben hinfu^er mit dem vorgenanten hawss mit seiner zwgehorung allen Irn frumb damit schaffen mit verseczen verchawffen schaffen machen vnd geben wem sew wellent doch geleichen lewttn dew vns dar zwe fuegleich sind. . . . Mitt Vrkund des briefs Besigilt mit vnser obgenanten Johanns Brobst vnd des Conuentz des vorgenanten Gotzhawss zw Herczogenburg payder Anhangunden Insigiln Gebn als man zalt von Kristi gepurd vierczehenhundert Iar vnd darnach in dem Newn vnd dreysigisten Iar An sand Thamans tag von Chandlberg des heyligen Bischolff.

Source Fulltext: FAIGL, Herzogenburg (Wien 1886) S. 436-437