Wir Fridreich von gotes gnaden Herczog ze Osterreich ze Steir ze Kernden vnd ze Krain Graf zu Tirol etc. Bekennen Als die Ersam geistlichen vnser lieben andechtigen ... der Abbt zu Varenpach . . . der Probst zu Herczogenburg vnd der Probst zu sant Andre auf der Traysem mit einancler stossig gewesen sind vmb die waid, gruntt holcz vischwaid vnd wasser von dem alten Marchstain vnder dem Grasperg, die In vnd Iren Gotshewsern vor czeitn gen weilent Weykharten von Retelperg vnd Gotschalchen von Flachenegk von Erbern leuten die Si darczu habent gepeten zugetailt sind nach begreiffung ains besigilten vnuerserten briefs der vns an heutigem Tag fu^erpracht vnd vor vns ist gelesen worden. Daz wir nach verhorung des yeczgemelten briefs vnd was all taill daczemal fu^erpracht habent mit derselben tail wissen vnd willen nach vnserer Ret Rat wolbedechtleich vmb solich der egemelten tail stoss vnd zwayung entschaiden haben wissentleich mit dem brief. Vonerst was von dem alten Marchstain von Pfeffingen trifft, vber nach Snurmass vber die Traysem vncz an den alten Marchstain vnder dem Grasperg, wie so das genant ist, vnd was niderhalb der Marchstain ist Waid gruntt holcz wasser vnd vischwaid, wie so das auch genant ist daz das alles sol fürbasser eewicleich der egenanten dreyer Gotsha^ewser sein dabei ewicleich ze beleiben, vnd fürbasser allen Iren frumen damit ze schaffen als es In aller pest wol kom vnd fuge an allen Irrsal vnd daz auch all obgemelt tail den Muluankch weder oberhalb der Marchstain noch vnderhalben nicht Irren sullen in dhainerlai weis. Item von des obgenanten besigilten briefs wegen den Si habent fu^erpracht vnd den der egenant, Probst von Herczogenburg vncz her innhat Mainen vnd wellen wir welher obgemelter tail desselben briefs vidimus nemen welle als offt im des durfft geschehe, daz Im des derselb Probst von Herczogenburg wer der ye zu zeiten ist stat tun vnd In des vidimus geben sol vngeuerleich. Wir wellen auch daz derselb Besigilt brief in allen seinen pu^enten vnd artikeln, als oben ist begriffen, sol genczleich bey krefften beleiben vnd die egenanten drew Gotshewser sullen sich des haltten, vnd die wayd grunt holcz vischwayd vnd wasser als oben ist gemeldet innhaben nuczen vnd messen nach lautt des selben briefs vngeuerleich. Vnd des zu Vrkunt geben wir yedem vorgenanten tail vnsern brief in geleicher lautt. Geben zu Wienn an dem Suntag Letare zu Mitteruasten Nach Kristi gepurd vierczehenhundert Iar vnd darnach in dem vierczigistem Iare.

Source Fulltext: FAIGL, Herzogenburg (Wien 1886) S. 447-448