IN nomine sancte et indiuidue Trinitatis Amen Venerabilibus in Christo patribus nec non Religiosis viris domino Johanni preposito Wolfgango decano totique Conuentui Monasterii sancti Georgii in Herczogenburga. ordinis Sancti Augustini patauiensis diocesis Thomas permissione diuina Abbas Georgius Prior totusque Conuentus beate Marie virginis in Gottwico ordinis sancti Benedicti eiusdem diocesis sincere plenitudinem caritatis. cum adoptione beatitudinis sempiterne. Quia enim vita hominum velut nunccius precurrens. et tamquam vmbra velociter transiens. ita ut homo iam floridus et amenus in ictu oculi velut lanugo que flatu venti tollitur et tamquam fumus diffusus in aere in nichilum redigitur. nec tunc sciri possit quis dignus sit odio uel amore. Super omnia expedire dinoscitur ut viri spiritales et maxime hii qui animorum atque locorum propinquitate coniuncti existunt querere debeant que sursum sunt non que super terram. decurrentisque vite sue tempora sic preuideant et disponant ut labore suo sic transitorio quietem perpetuam valeant emercari Ad quod vtique perficiendum nichil aliud credimus profuturum quam ut fusis pro inuicem piis obsecracionibus. placabilem sibi reddant supernum Judicem ut in ira misericordie recordetur Animaduertentes eciam orationis virtutem que non solum ad eum pro quo petitur extenditur. verum eciam ad ipsum orantem cum multiplici reuertitur fructu. Hinc est quod vos quos fauorosissimis affectibus amplectimur affatim omnium bonorum operum que dei pietas immensa per nos et posteros nostros elargietur repleri cupimus vos et quemlibet vestrum tam presentes quam futuros in vita pariter et in morte in perpetuam confraternitatem. iuxta v. p. adoptata per presentes vobis ascribimus et assumimus in effectu. desideranter volentes ut cum vnus aut plures vestri predicti Monasterii frater seu fratres professus aut professi huius viam carnis domino vocante ierit siue ierint id nobis aut nostris posteris a vobis uel successoribus vestris litteratenus innotescat Exinde eadem nocte arridente oportunitate alioquin proxima die occurrente pro competencia nostre habitudinis vigilias maiores et demane missam defunctorum in vtroque Conuentu cantabimus cum cerimoniis et sollempnitatibus apud nostrum Monasterium solitis et consuetis. quemadmodum in exequiis vnius fratrum nostrorum facere consueuimus hucusque Consequenter vero quilibet sacerdotum ipso uel alio die competenti vnam pro eiusdem fratris anima leget missam. Clerici vero infra sacerdocium constituti vnam quinquagenam psalmorum ffratres vero Conuersi si qui eo tempore in nostro Monasterio fuerint. Centum orationes dominicas cum totidem angelicis salutacionibus et vnum Symbolum dicere tene buntur Demum vero nomina ipsorum fratrum defunctorum nostris Annalibus mortuorum libris ascribemus Quod eciam per vos pro nobis et nostris successoribus indesinenter fieri confidimus Et ne pie recordacionis predecessores fratres sacerdotes ac cuiuscunque conditionis vestre ac nostre ecclesie a tali pie deuotionis voto aliquomodo separentur Statuimus vt Sexta feria festum Omnium Sanctorum proxime sequente singulis Annis sollempniter cum Vigilia et Missa ipsorum defunctorum ac viuorum fundatorum ac Benefactorum celebretur memoria specialis Cum eciam beatis patribus Benedicto et Augustino in his reuerencia sanctis debita merito exhibeatur Similiter et nostrorum Monasteriorum fundatorum memoria cum cerimonialibus habeatur. Statuimus festum S. Augustini sollempniori modo quo antea Ac in die deposicionis felicis recordacionis Vdalrici Episcopi vestri Monasterii fundatoris de sero cum Vigilia maiori et de mane cum Missa decantanda diligenter peragi Et ne hec fraternitatis inter nos et vos Coniunctio ab aliquo in posterum valeat irritari uel in Obliuionem deuolui. presentem paginam vobis damus Sigillorum Nostrorum robore communitam Datum Nostro in Monasterio Gottwicensi Sexto Idus Decembris Anno domini Millesimoquadringentesimoquadragesimo secundo.

Source Fulltext: FAIGL, Herzogenburg (Wien 1886) S. 456-458