ICH Peter ysprer burger zu Stain vnd Ich Dorothea sein Hausfraw Bekennen für vns vnd vnsern Sun vrban der noch vnuogtper ist offennleich mit dem brieff vnd tunn chund menikleichen allen leuten den er fürkumbt Das vns die Erwirdigen geistleichen Herren Brobst Johanns Brobst des Goczhaus zu Herczogburkch vnd der Conuent gemainkleich da selbs mit verayntem muet vnd Rat lassen habent vnerkaufft auf vnser dreyer leib Lebteg Ire aindleff fiertal weingarten gelegen in Irer pewnt zwischen den Steten Krembs vnd Stain vnd stosset an Ir Haus daselbs Also beschaidenleich das wir denselben weingarten nu hinfür schullen Innehaben vnd In dauon Raihen vnd geben schullen von erst von den ersten drein Iaren nacheinander komend das ist von den ersten drein lesen schullen wir In Jerleich geben den virden ember most Darnach hinfür schullen wir In lerleich geben den dritten ember vnd nicht mer Wir schullen auch denselben weingarten an all ir mue in Ir press lesen vnd schullen In den tail bey der press geben den Sy dann in Ire vas schullen vechsen Wir schullen auch den weingarten nicht lesen noch den most bey der press tailln Es sey dann Ir Anballt vnd pot dabey Wir schullen auch den pressern vnd andern arbaittern chost liecht vnd lo^en geben an die trager den Sy lo^enen schullen von Irem tail Sy schullen auch zehenten von Irem tail vnd wir von vnserm tail vnd Si schullen verRichten das purkrecht Sy schullen auch in die press allen gerecht schaffen an all vnser mue Wir haben auch freye wal denselben weingarten zu verseczen oder zu verkauffen mit den Rechten die wir daran haben ainem gleichen mann der In fuegleich sey vnd schol das geschehen mit Irem willen vnd handen Wir schullen auch denselben weingarten in Rechtem gu ^eten paw halden mit Stekchen mit Grueben vnd mit anderm paw das darczu gehort Teten wir des nicht das Sy das mit den nachtpawrn vnd vmbsessen beczeugeten So schullen Sy vns mit vnserm tail in dem lesen bey der press phennden vnd das schol sein mit vnserm guten will vnd schullen wir von vnsern Rechten gefallen sein als ob wir tod wern. Sy pindent sich auch darczu wann das ist das der lest vnder den drein leiben mit tod von der weld schaidet vnd das erst paw in dem weingarten volpracht hat das er die nucz desselben Iars mit dem lesen geschaffen mag wemb er wil, also das dem weingarten an dem andern paw vncz zu demselben lesen nicht verczogen werd vnd schol fürbas derselb weingarten In vnd Irem Gotzhaus ledig sein an all chrieg vnd wider Red vngeuerleich Des ze vrkund Geben wir den egenanten Erwirdigen Geistleichen Herrn dem Brost vnd dem Conuent des Gotzhaus ze Herczogburkch vnd allen Iren nachkomen den brieff Besigelten mit der Erbern Andreen des armpilgrem burger zu Stain vnd Hannsen des Grueber auch burger vnd Statschreiber daselbs baider Anhangunden Insigeln die wir vleissikleich darumb gepeten haben In vnd Irn Erben an schaden Darunder wir vns verpinden mit vnsern trewn alles das war vnd stet zu halden das vor geschriben ist Geschehen nach cristi gepurd virczehenhundert vnd Im dreuvndvirczigistem Iar an Suntag nach sannd Johanns tag zu Sunenbennden.

Source Fulltext: FAIGL, Herzogenburg (Wien 1886) S. 458-460