ICH Stephan pawr zu Talarn vnd ich Margaret sein Eeleichew Hawsfraw veriechen vnd tu^en kund offenleich mit dem brief allen den dy in sehent ho^ernt oder lesentt Das wir nach guetm Rat vnser nachsten frewnt zu der zeit da wir es mit Recht wol getun machten Rechtt vnd Redleich verkaufft vnd zu kauffen geben haben ein wismad gelegen Innerhalb der frawndarffer vnd der Hilppersdarffer viechwaid Innerhalb des valltar in der Aw vnd ist vnsser freyes purkrecht vnd ze lehen von dem Edlen vnd vessten Thaman dem wehinger Da von man Ia^erleich dint drey schilling pfennig an sand Io^ergen tag Auch dem obgenanten lehenherrn Thaman dem wehinger vnd seinen Eriben vnd nit mer Dem Erbern vnd Geistleichen Hern Her Stephan karherr zu herczogenburg dye tzeit verweser vnd pfarrer des Gotzhaws zu Reydning vnd allen seinen nachkomen aus sand Ioergen gotzhaws zu herczogenburg auch fu^er freyes purkrecht vmb ain Sumb gelts der wir gancz vnd gar von Im ausgericht vnd beczallt sein zu Rechten ta^egen Es mag auch der Eegenant herr her Stephan vnd all sein nachcho^emen fu^erwas mit dem obgenanten wismad allen irn frumb schaffen mit verkawffen versetzen Schaffen vnd geben wem sew wellen an vnser vnd vnser aller eriben vnd menikleichs irrung vnd hindernuzz In soleicher beschaidenhait Das es sey vnd geschech mit vrlab vnd gunst des erbern geistleichen herrn dyselb zeit brobst vnd verweser des Gotzhaws zu herczogenburg vnd des ganczen Conuent doselbs Wir obgenanten sein auch mitsambt vnser eriben des vargenanten wismad In den vargeschriben Rechten sein recht Gwer fuerstand vnd Scherm fu^er all ansprach als soleichs kawfs vnd freyes purkrechts des Lands zu O^esterreich recht ist. ... So wir obgenant aygen Sigl nit haben vnd das der kawff fu^ewazz also stet vnd vnczebrochen beleib des zw warer vrkund gib ich obgenanter Stephan pawr vnd Margaret sein hawsfraw den brief besigelt mit des edeln manns Herman Gruenpek anhangunden Insigl dy selbig zeit phleger meins herrn von wehing vnd Richter zu Sitzenperg Dahinder ich mich verpint als das stet zu halden das oben an dem brief geschriben stet Zu pesser sieherhait pitt wir auch den Edlen Vlreichen den pogschu^etz das er sein Sigl an den brief hach zu warer tzewgnuzz als das oben geschriben stet sta^et zu haltten doch In vnd allen irn Eribn an schaden Der briff ist geben nach christi gepuerd in dem vierczehenhundertistem Iar darnach in dem funfvndvirtzigisten Iar Des suntag in der vasten genant Iudica.

Source Fulltext: FAIGL, Herzogenburg (Wien 1886) S. 465-466