Venerabilibus ac magne religionis viris prelatis ac dominis Domino Iohanni preposito bene merito ceterisque dominis Monasterii Canonicorum Regularium in herczogeburg in cristo nobis dilectis. frater Georius de ualle Speciosa Sacre pagine professor Prior prouincialis prouincie Bauarie. Austrie. Morauie. Bohemie. Slesie. Stirie. Carinthie et polonie Salutem in domino sempiternam. Meretur vestre deuocionis affectus ac pie intencionis feruor, quem ad nostrum ordinem ut relacione veridica didicimus concepistis, magis ac magis aput deum continuis muniri et attolli suffragiis, vt quo largius ac copiosius super vos gracia diuina coruscat, eo amplius bonitas vestra aput altissimum proficiat, Sed ut huiusmodi deuocionis obsequia auctore domino vobis sint fructuosa, vestras reuerencias ad nostram assumimus confraternitatem. facientes vos participes omnium Missarum, predicacionum, Jeiuniorum, Oracionum, vigiliarum, Abstinenciarum, Castigacionum, laborum, ceterorumque spiritualium exerciciorum, que saluatore largiente in prouincia nostra per fratres operari dignabitur clemencia saluatoris addicientes nichilominus in speciali, ut cum obitus alicuius vestrum quem deus faciat felicem In nostro prouinciali capitulo fuerit intimatus, pro animarum vestrarum remedio oraciones per prouinciam iniungemus ac suffragia celebrari que pro nostris defunctis fratribus ab ordine fieri consueuerunt. In cuius rei testimonium Sigillum nostre confraternitatis presentibus est appensum. Datum in Paden Anno Domini Millesimo Quadringentesimo Quadragesimo quinto proxima feria secunda post festum Sancti Georn martiris.

Source Fulltext: FAIGL, Herzogenburg (Wien 1886) S. 466-467