ICH Peter Wagner zu Seebarn Vnd ich Margarecht sein Hawsfraw Ioerg vnd Jacob ir payder kinder Vnd ich Michel Czwichsauff auch van Seebarn vnd Margarecht sein Hawsfraw Elzpet vnd Margarecht ir payder kinder Wir vergechen offenlich mit dem Brieff allen lewten gegenbu^ertigen vnd kunftigen das wir van dem erbirdigen vnd geystlichem herrn hern Johannsen Brobst zu Sand Georgn Gotzhaws zu Herczogenburg vnd auch van dem Conuent daselbs westanden haben vnser lebta^eg vnd auff vnser leib allain yder sein tail weingarten nach ausweysuug des Brieffs den wir van In darumb haben In solher mass das wir die Inhaben vnuerchumert In guetem mittern paw Also beschaydenlich, das wir an all ir mue dy selben weingerten in ain press lesen in aim tag nach einander vnd In den dritten emer aws den selben weingerten in der press geben vnd wir In van vnserm tail zechent geben Wir schullen auch dew vorgenanten weingarten nicht lesen noch pey der press tailen es sey den ir anbalt oder scheinpot dapey Wir schullen auch den pressern vnd andern aribayttern chost liecht vnd lan geben Wir schullen auch dew vorgenanten weingerten in rechtem gutem paw halden Mit mist mit Stekchen mit gruben vnd mit andern paw das darczu geho^ert Teten wir des alles nicht vnd das se das mit den nachpawrn alles peczewgtn oder mit andern pawlewtn So schullen wir dann van vnsern rechten geuallen seinn recht als ob wir tad wern Auch ist ze merkchen wann das ist das der lest leib vnder den vir vorgenanten leyben mit dem tod vann der welt schaydet auff welhem tail das wer vnd ob er das erst paw in dem weingarten volpracht hyet So mu^egen sich seinn nachst frewnt der nucz desselbign Iars vnderwinden doch also das den weingerten nichts dar Inn verczogen werd alls oben an dem Brieff begriffen ist mit allen punten vngeverlich vnd schullen denn fuerbas der oder dew weingerten irem vorgenanten goczhaws ledig vnd frey sein an allen krieg vnd widerred vnd menichleichs van vnsern wegen Mit vrkchund des Brieffs Besigiltn mit des Edln Petern des Griespekch anhangunden In Sigl vnd auch des Edln Jacoben des Swarczen anhangunden In Sigl In vnd irn erben an schaden. Vnder der payder Sigil wir vns verpinden alles das Stet vnd war ze haben Vnd wir sew auch fleyssikchleich gepetn haben Geben nach Christi gepurd virtzechen hundert Iar darnach Indem funff vnd virtzigistem Iar an dem andern Suntag in der Vasten.

Source Fulltext: FAIGL, Herzogenburg (Wien 1886) S. 463-464