ICH Peter Kyeneisen Capplan Sand Niklas Altar zu Hederstorff Ich Io^erg Kyeneisen gesessen zu Sitendorff Vnd ich Katrey Michelln des Waldner weylent Burger zu Hederstorff Seligen witib der vorgenanten Kyeneysen Swester Vergehen offenlich mit dem Brieff fu^er vns vnd all vnser eriben vnd twnn kund Menikchlichen allen lewten gegenburtigen vnd kunfftigen das wir mit bolbedachtem mu^et vnd auch zu den zeiten da wir das an irrung vnd widersprechen aller vnserer eriben wolgetwnn machten vnd auch recht zu twnn heten Mit herrn Handen des erbirdigen geystlichen herrn hern Johannsen dye czeit Brobst Sand Georgn gotzhaws zu her czogenburg vnser ledigs vnd vnuerchumerts Lechen gelegen zu Tyemdorff. dauon man jerleich gibt zu dinst dem egenanten herrn Johannsen Brobst Sand Georgn gotzhaws zu Hertzogenburg seinem Conuent vnd nachkomen daselbs In iren pharrhoff zu Haytzendorff drey schilling phennig an sand Michelstag vnd nicht mer Mann dient auch von dem benanten lechen dem Hochgeparn fürsten dem Herczogen in Osterrich zechen Meczen habern zu Marichfueter an sand Gilign tag In das Slu^esslambt¹⁰⁸ zu Krembs vnd auch nicht mer Allso haben wir das benant lechen mit aller seiner zuegehorung an rechten vnd nu^eczen So dartzu geho^ern vnd dauon bekomen mu^egen alls dann dieselb zuegeho^erung hernach geschriben stet Von erst ain o^eder flekch darauff ain behawsung ist gelegen zwischen des Petern Kumersteller vnd Philippen des Nusser Hawsser Item drey gancz lu^ess ekkcher in dem selben veld zu Tyemdorff mit sambt den krawtgerten vnd pawmstetn Item es dient auch der benant Peter Kumersteller in das obgenant lechen von aim garten in den lu^essen oder wer den nach in Inhat sechs wyenner phennig an sand Michels tag. Der genant garten ist gelegen zwischen Andre des Pewger zu Tyemdorf vnd Micheln des Tunkchel zu Walkchendorff baider gerten Recht vnd redlich verchawfft vnd zu kauffen geben dem Erbern Hannsen Smidwerger vnd Katrein seiner Hawsfrawnn vnd ir baiden erben vmb ain Sumb geltz daran vns bolgenugt vnd der wir von In zu rechten ta^egen an allen schaden gancz awsgericht vnd beczalt seinn Darumb so haben wir In das benant lechen mit aller vorgeschriben zwegeho^erung alls wir dyselb Ingehabt haben mit allen ern rechten vnd nu^eczen Ingeantburt zu iren handen in ir nucz vnd gewer in So^elicher gerechtikait das sy das nu hinfu^er schullen Innhaben nu^eczen vnd nyessen vnd allen Iren frwm damit zu schaffen mit verseczen verkauffen schaffen machen vnd geben wem sy wellen vnd damit hanndln nach Irem wolgeuallen an Irrung vnd widersprechen vnser vnd aller vnser eribern vnd Menikchlichs vngeuerlich Wir egemelte Peter und Io^erg dy Kyeneysen auch ich Katrey ir Swester seczen vns fu^er vns auch fu^er all vnser erben vnd menikchlichen dem benanten Hannsen Smidwerger vnd Kathrein seiner hawsfrawn vnd ir baider erben des vorgenanten lechens vnd kauffs zu Rechten gewern scherm vnd fu^erstand fu^er all ansprach alls dann solichs kawffs In dem lannd zu Osterrich recht ist. . . . Mit vrkund des Brieffs mit des obgemelten lechen herrn hern Johannsen Brobst Sand Georgn gotzhaws zu Herczogenburg anhangunden In Sigil den wir mit vleis darumb gepeten haben. darunder wir vns mit vnsern trewnn verpinden alles das stet zu haben so var an dem Brieff geschriben stet Der geben ist nach Christi gepurd virtzechnhundert vnd darnach in dem sechsvndvirtzigistem Iar an dem Palmtag.

Source Fulltext: FAIGL, Herzogenburg (Wien 1886) S. 468-470