IN nomine domini Amen Reuerendo in Christo patri ac domino Domino Johanni Preposito Hainrico decano Totique conuentui Monasterii sancti Georgii martiris in Herczogenburg ordinis sancti Augustini canonicorum regularium patauiensis diocesis ffridericus decanus Totumque capitulum ecclesie collegiate sancte Marie in Matikofen canonicorum secularium predicte diocesis Post condignam recommendacionem cum oracionum incremento sinceram in domino caritatem Ex quo in epistola libri machabeorum populum dei admonentis legitur Quam sancta et salubris sit cogitacio pro defunctis exorare ut eo facilius et cicius a peccatis liberentur Orare et nos tenemur et volumus pro invicem ut cum ipsis pariter saluemur ut dileccio caritatis opere et veritate se longe lateque diffundat Postquam vestrarum reuerenciarum postulata fraternitate iocundanti capientes animo que vestre nobis porrexerunt et aquieuerunt littere dulcorose fini plenius adherere fecimus concupito et in maioribus faciemus affectantes dum viuimus vestra sicut dignum est rogamina humilius et copiosius exaudire Hinc est quod quamuius specialis deuocionis affectu vniuersos vestri conuentus alumpnos sincero amplectamur beneficio caritatis eosque oportunis vbilibet fauoribus et promocionibus cordiali prosequamur desiderio Quare nos iuxta salubrem aliorum Christi fidelium consuetudinem ad vnionem nostre fraterne fidei singularis dileccionis federe adunati vestras reuerendas et multum venerandas dilecciones ac cuiuslibet vestrum ut pretactum est sinceriter suscipimus delegantes vobis cunctisque vestris successoribus tam in vita quam in morte participes esse et fieri omnium que cottidie gracia dei cooperante in quibuslibet diuinis exhibemus seruicns missarum oracionum vigiliarum et aliis piis generaliter accionibus quas per nos et posteros nostros operata fuerit saluatoris clemencia Hiis nichilominus sine fraude et dolo fidedigna pollicentes vt cum fratris vnius canonici vel plurium dedicto monasterio in Herczognburg siue domicellorum sacros ordines habencium obitus nobis fuerit insinuatus vigilias maiores Missam subnota secundum ritum nostri collegii deuote et fideliter persoluemus pro anime defuncti remedio salutari Deinceps quilibet sacerdotum de eadem fraterna vnione existencium ipso vel alio die leget vnam missam Nomenque ipsius defuncti nostris annalibus mortuorum libris memoriter annotabimus Hoc Idem nobis fieri eciam desideramus vt si nonnulli sacerdocium nondum perfecte habentes missamque et alia ad sacerdotale officium pertinencia perficere non queant saltem vigilias et que licent deuocione qua potuerint non negligentes. In huius igitur fraterne vnionis perpetue durature euidens testimonium presentes eque litteras vestre tradimus caritati Sigillorum nostrorum videlicet decanatus et capituli appensionis munimina roboratas. Datum in prenominato nostro collegio in Matikofen Anno domini Millesimo Quadringentesimo Quadragesimo sexto in die vndecim Milium virginum.

Source Fulltext: FAIGL, Herzogenburg (Wien 1886) S. 470-471