Nos Pabo dei gracia prepositus, totumque Collegium Ecclesie Nevmburgensis notum facimus vniversis tam presentibus, quam futuris quod cum Meinhardus dictus Rueppel quoddam molendinum situm in Pyrchenwart in parte ville inferiori temporibus domini Nycolai prepositi antecessoris nostri ad servicium sexaginta denariorum pro quatuordecim libris denariorum comparasset, et idem Molendinum cuidam discreto viro Wernhardo dicto de Sweinwart vendidisset. Ecce idem Wernhardus ad nos veniens humiliter petivit et devote, quatenus sibi eandem empcionem nostris ac nostri Conventus litteris ad futurum periculum evitandum vellemus confirmare, nichilominus tamen decem libras denariorum proinde exhibebat. Nos vero ipsius precibus inclinati prefatum Molendinum sibi et uxori sue domine Margarete ac ipsorum heredibus justo iure, quod Purchrecht dicitur, dedimus sive confirmavimus perpetuo possidendum. Ita tamen vt nobis censum prelibatum, videlicet sexaginta denarios, in festo sancti Michahelis solvant annis singulis de eodem. Insuper idem Wernhardus et uxor sua domina Margareta sub obtentu Molendini prelibati firmiter promiserunt, quod si eos, vel ipsorum heredes vendere contingeret Molendinum prelibatum, nulli advene aut extraneo dare debeant, sed tantum nostris Colonis in Pyrchenwart constitutis. In huius rei testimonium dicto Wernhardo ac suis Heredibus hanc paginam dedimus sigilli nostri ac nostri Conventus munimine roboratam. Testes sunt Domini Hiltprandus Decanus, Otto de Arnsperg, Minhardus, Otto Camerarius, Henricus pedagogus, Hertwicus custos, Paulus Hospitalensis et ceteri Canonici Nevmburgenses, frater Henricus de Spanneberch, D. Fridericus Hutstock, D. Wernhardus de Sweinwart, D. Albero de Pellendorf Milites, Cholo officialis, Chunradus Chobech, chunradus filius suus, Rugerus notarius, Hugo, Wernhardus fratres de pellendorf, Gvndoldus officialis de Pyrchenwart, Vlricus Villicus, Vlricus sororius suus, Gundoldus, Henricus Hohenmorgen, et alii quam plures fide digni. Datum et actum in Nevmburch anno domini M°CC°LXXX°. secundo. In die Sancte Cecilie virginis.

Source Fulltext: ZEIBIG, Klosterneuburg (=FRA II/10, Wien 1857) S. 30