Quanto studiosius ea, que fiunt inter homines, memorie commendantur, tanto minus scrupuli relinquetur posteris de eisdem. Nos igitur Agnes, Relicta Rapotonis de valchenberch, Hadmarus et Rapoto, filii nostri Margaretta relicta Ottonis de Sunnberch filia nostra etati presenti pariter et future cupimus fore notum, quod balnearem stubbam sitam in Nevmburch dictam scherfingspadstuben nobis iure proprietario attinentem de consensu omnium, qui ius hereditarium capere poterant in eadem, vendidimus honorabilibus viris, Domino Paboni preposito et toti conventui sanete Marie ibidem pro triginta et duabus libris denariorum Wiennensium simili iure libere et perpetuo possidendam, constituentes nos in solidum vendicionis huiusmodi juxta terre consuetudinem veros et legitimos defensores, et non solum in robur fîrmitatis perennis vendicionis eiusdem litteras domini nostri Alberti illustris ducis Austrie, quo consenciente et in cuius presencia hec sunt facta, obtinuimus speciales, sed et quorundam dominorum nobilium infra scriptorum, qui similiter aderant, apponi sigilla procuravimus presentibus et appendi. Et licet nos Agnes et Margareta sigillis propriis careamus, tamen ipsos, prepositum et Conventum, apposicione sigilli filiorum nostrorum Hadmari et Rapotonis predictorum nomine nostro et ipsorum facta contentos esse volumus in cautelam et testimonium evidens premissorum. Testium autem nomina, et qui sua appenderunt sigilla, sunt ista. Domini Otto de Haslowe, Hermanus de Wolfgerstorff, Albertus de půchaym, fridericus dapifer de Lengpach, Henricus de plench, Ottacharus castellanus in Greytschenstayn, Ministeriales Austrie. Dittricus et Chvnradus fratres de Chalnperg, Vlricus Speysmagister, Cholo officialis de Nevmburch, fridericus hu^otstok milites, et alii plurimi fide digni. Actum et datum Wienne Anno domini Millesimo ducentesimo LXXX° quinto Pridie Idus decembris.

Source Fulltext: ZEIBIG, Klosterneuburg (=FRA II/10, Wien 1857) S. 32-33