Ich Jacob vnd ich Heinreich, hern Ernsten svne, burger ze Wienne wir vergehen offenlich, vnt tuen chunt allen den, die disen brief lesent, oder hoerent lesen, die nv lebent, vnt hernach chvnftich sint. daz wir mit gvetem willen, vnt mit verdachten muet dem Chloster, vnd den frowen von Sant Mareien Magdalen avzzerhalb der purchmawer vor Schotten pvritor ze Wienne auf der bastvben, dev auch vor demselben pvritor nahen bei der Nevmburgerhof gelegen ist, da man vnser aller ierlich von dient Nevn phvnt ze rechten pvrchrechte ze drin Zeiten in dem iar, als pvrchrechtes recht ist, vnt vierzich phenninge an sant Myehhels tach ze rechten grvnt recht den Schotten. Derselben Nevn phvnt pvrchrechtes habe wier den vorgenannten frowen gegeben ze chavffen sechs phvnt, der han ich Jacob von meinen tail verchavffet vierdhalp phvnt vmb fvnf vnt dreizzech phvnt wienner phenninge. So han ich Hainrich von meinen tail verchavffet drithalp phvnt vmb zwaintzich phvnt wienner phenninge. Vnt sein auch derselben phenninge schon vnt vollichleich gewert. Wier haben auch dasselbe Pvrchrecht den vorgenanten frowen gegeben ewichlich vnt gervechlich ze haben, vnt allen iren frvm damit ze schaffen also beschaidenlichen, ob daz were, daz devselbe bastvbe verbrvnne, oder sust zestoeret wurde, oder von welhen sachen daz were, daz si vngoltich wurde, so sol man in nicht endienen der vorgenanten sechs phvnt vncze an die zeit, daz si wider bestiftet wurde. Vnd wer auch daz daz der vorgenanten bastube nach der stiftunge vnd si wider bestiftet wurde, des alten pvrchrechtes abgienge, vnt si nicht mer dienent wurde, danne dev sechs phvnt, dev die vorgenanten frowen angehorten, dev sol man in dannoch mit allen recht, swer dieselben bastuben hab in gewer oder in Gewalt aller ierchlich dienen ze drin zeiten in dem iar, als vollichlich, als vor, vnt doch also, daz man daz vorgenantn grvntrecht dem Chloster hincze den schotten immer ze seiner zeit vor dienen sol, vnd darnach den vorgenanten frowen daz ier pvrchrecht ze disen drin zeiten aller ierchlich ze Weihnachten zwai phvnt, ze sant Jorgen Messe zwai phvnt, vnt an sant Michhels tach zwai phvnt. Ovch werde wier des vorgenanten pvrchrechtes, daz wier den vorgenanten frowen ze chauffen haben gegeben, rechte scherm vnt desselben schermes rehte gewern, als der stat recht ist fver alle ansprach. Daz diesev rede, vnt diser chavf also stet sei, vnt immer vestichait hab, noch niemen hernach verwandelt, noch zebrochen werde, darvber gebe wier den vorgenanten frowen disen brief ze einem sichtigen vrchvnde diser sache, vnt bestetigen in den versigelten mit des ersamen aptes, hern Wilhalmes insigel von den Schotten ze Wienne, der auch der vorgenanten bastvben rechter grvntherre ist, vnt auch mit vhser baider insigeln. Des sint gezevge: Wernhart der Chrevtzer, chvnrat des alten Chastneres svn, Gozze der chramer, brveder Heinrich, brveder Dietmar, brveder Eber, die brveder von sant Marien Magdalen, Chvnrat der Witze, friderich der schotten amman, andre hern lambers svn, Altman der munzer, vnd ander biderbe levte genuege. Dieser chavff ist geschehen des iares, do von Christes gebuert sint gewesen Tausent Jar, zwaihvndert Jar, vnd In dem zwai vnd Nevnzigisten Jar an sant Avgusteines tach.

Source Fulltext: ZEIBIG, Klosterneuburg (=FRA II/10, Wien 1857) S. 41-42