Wier Brobst Hadmar von Gotesgenaden vnd die samnvnge ze Nevmburch tu^en chunt an disen brief, daz vns her Alber von Pusenberge hat aufgeben ein halben lehen ze Trestorf rechtes aigens, vnd ist auch vnser scherm Worten mit gu^etten Willen vber die Vorgenanten aigenschaft also alles aigens recht ist, so hab wier mit vnser samnvnge gůten Willen daz vorgenant halbe lehen Chvnraten dem Revsen von Nevnburch verlihen ze rechten Pvrchrecht also, daz er vns schol dienen dreizzich Wienner phenninge an Sand Mychahels tach alle iar, vnd schol von vns niht beswart werden, weder mit fver, noch mit nacht selde, noch mit niht anders, vnd daz selbe halbe lehen schulle wier vnd vnser samnvnge, dev nv ist, oder nach chvmftich wiert, verantwurten an aller stat, also reht ist. Darvber zv einer vrchvnde hab wier dem vorgenanten Chvnraten diesen brief besigelt mit vnserm insigel. Des sint gezevge Her Nyclos, Her Chvl, ffriderich hvtstoch, her Wernhart Schiver, Her Pernhart vnd her Vlrich von Rizendorf, herman Ymian, Her Albreht der Sibenhoz, Her Ortwein, Her Prehtel der Schreiber, Albreht des sibensvsen svn, Chvnrat von Mukerawe, Rvedolf zoll, Livpolt vnder der Lavben, Livpolt schem, her herman vnd her prehtel der hvrrein. Daz ist geschehen, dv von Gotes pv\erde waren Tausent jar vnd zwaihvndert jar vnd drev vnd Nevnzich Jar.

Source Fulltext: ZEIBIG, Klosterneuburg (=FRA II/10, Wien 1857) S. 45