In nomine Domini. Amen. Nos Christannus dei gracia Abbas Celle angelorum, Ekhardus in sancto ypolito et Ainwicus in sancto floriano ecclesiarum prepositi, et Gerlacus plebanus de Dreschirichen, inclyte Romanorum regine Capellanus a Reverendo patre domino Nostro Wernhero venerabili Pataviensi episcopo ad omnia monasteria sanctorum Benedicti et Augustini ordinum infra Anasum constituta sibique subiecta Patviensis diocesis in officio inquisicionis sev visitacionis literatorie destinati tradito nobis pleno mandato et auctoritate integre reformandi, corrigendi, deponendi, instituendi et destituendi et generaliter omnia faciendi, que pro bono statu ecclesiarum predictarum et personarum statuenda videremus iniunctum nobis inquisicionis ministerium reverenter exequentes ad ecclesiam venimus Newnburgensem, vocatis itaque feria quinta proxima post festum Pentecostes Preposito, decano et conventu Newnburgensis ecclesie predicte ad nostram presenciam et eisdem apparentibus coram nobis facta ipsis primum iurisdictionis nostre copia ab ipsis de dicenda nobis veritate super toto statu ecclesie sue predicte ac super infamia, qua dominus Hadmarus loco illius prepositus notatus fuerat aput bonos exegimus et recepimus a quolibet in specie iuramenti. Predictis itaque preposito, decano et conventu, sigillatim et in sequestosecundum formam iuris auditis, et dictis eorum in scripto redactis et diligenter examinatis tum ex deposicionibus eorundem tum ex notoria infamia incontinencie precedentis, tum eciam ex spiritualium negligencia, qua ordo beati Augustini tam in claustro canonicorum, quam in ecelesia sanctimonialium non mediocriter collapsus fuit, tum eciam ex dilapidacione amborum claustrorum predictorum, quam oculis vidimus, manibus contrectavimus ita notoria est, quod nulla potest tergiversacione zelari, quem visibiliter extremam ruinam et irrecuperabilem iacturam minatur ecclesiis antedictis, invenimus dominum Hadmarum prepositum Newnburgensem antedictum ad gubernacionem Newnburgensis ecclesie insufficientem et inhabilem ac inutilem et in spiritualibus et temporalibus negligentem, ac ex commisso periurio et aliis causis coram nobis probatis prelacionis honore et officio indignum, maxime cum de emendaccione nulla spes esset: propter quod habito sapientum virorum consilio invocato dei nomine sana nos consciencia perurgente, eundem dominum Hadmarum auctoritate, qua fungimus, prepositura Newnburgensis ecclesie privamus in hiis scriptis, ipsum sentencialiter deponimus et absolvimus ab eadem absolventes Decanum et Conventum Newnburgensem et alios quoscunque sibi obligatos et obnoxios a sua obediencia et mandantes eisdem, ut nullam ex nunc in antea respcetum in spiritualibus et temporalibus habeant ad eundem, sed sibi per electionem canonicam provideant de preposito et prelato. Lata est hec sentencia Newnburge in choro presentibus decano et conventu Newnburgensi preposito predicto se per contumaciam absentante Anno Domini M°CCC° primo feria sexta post festum penthecostes In quorum testimonium presentes dedimus literas nostris sigillis munitas.

Source Fulltext: ZEIBIG, Klosterneuburg (=FRA II/10, Wien 1857) S. 67-68