Ich Otto der Tuers von Rawhenekke vnd ich Peterse sein hausvrowe vnd ich Otte ir paider svn wir verichen vnd tuen chunt allen den die disen prief lesent oder horent lesen, die nv lebent vnd hernach chunftich sint, daz wir mit vnser erben gutem willen vnd gunst vnd mit verdachtem muete vnd mit gesampter hant zu der zeit, do wir iz wol getuen mochten, haben ledichleichen vnd vreyleichen vnd vnbetwungenleichen aufgegeben dem erbern herrn Brobst Rudgern vnd der samnunge gemaine vnd dem gotshaus vnser vrowen da ze Newnburch vnsers rechten aygens zwai phunt wienner phenninge geltes auf zwain halben lehen da ze Alrichestorf mit allem dem nucz vnd recht als sie vnser vodern vnd auch wir in aygens gewer herpracht haben also, daz si damit all iren frumen schaffen, verchauffen, verseczen vnd geben, swem si wellen an allen irresal vnd sein auch wir, ich Otto der Tuers vnd ich Peterse sein hausvrowe vnd ich Otte ir paider svn der vor genanter zwaier phunde geltes auf den zwain halben lehen da ze Alrichestorf vnsers hern Brobst Ruedgers vnd der samnvnge gemain vnd des Goteshauses vnser vrowen rechter gewervnd scherm fur alle ansprache, als aigens recht ist vnd des landes gewonhait ze Ostereiche, vnd geben in daruber disen prief zu ainen sichtigen vrchvnde, vnd ze ainem offen geczeuge vnd ze ainer ewigen vestnunge diser sache versigilten mit vnserm insigil vnd sint auch des geczeug her Fridrich der hutstoch von Newnburch, Herr Wernhart der Schiver, her Vlreich des hofmaisters svn, her herman ymian, her Ortolf von der heiligen stat, Gerung, hern Choln svn, Tazze sein pruder, Ruedger von der heiligen stat, Jans von Nuzdorf vnd ander frume leut genuech. Diser prief ist geben ze Wienne, do von Christes gepurt waren ergangen drevczehen hvndert iar in dem ersten Jare an sant Lucien tage.

Source Fulltext: ZEIBIG, Klosterneuburg (=FRA II/10, Wien 1857) S. 76