Ich Nycla hern Hainreiches svn des Chamerer von Neunburch vergich - - daz ich dem erbern Gotshaus ze Neunburch meineweingarten ze haben nach meiner hausfrowen tod vern Alheiden geschaffet han, des ist ein halbe Jeuch vnd leit pei der Chamerpevnt, den mein vater gechauffet hat, vnd mir nach seinen tod ze tail ist gevallen, da ich mit meiner Mueter getailet han. Darzu schaff ich den Vorgenanten Goteshaus ein haus, das leit auf dem Anger ze Neunburch, daz ist meiner Mueter Leipgeding swanne dev sturbet vnd mein hausfrowe der vorgenant, so schol dasselb haus des vorgenanten Gotshaus sein, also bescheidenleich, ob ich tod lig auf dem Weg, da ich gegen Rom var, vnd nicht her wider chom, chom ich aber wider, so sol iz mein sein, als e, daz dev red stet beleih vnd verhaz vnzebrochen, gib ich disen brief versigelt mit meinem Insigel. Diser red vnd diz gescheftes sint gezevg die erbern Ritter, her Fridreich der Huetstoch, her Wernhart der Schiver, her Herman Ymian, Gerunch vnd Tazze hern Choln svn vnd Engeldich vnd Reinger vnd ander frvm Levt genuech. der brief ist gegeben, da nach Christes geburtte warn Tausent Jar, drevhundert iar‚ darnach in dem andern iar des nechsten Eritages vor sand Peterstag, als er auf dem stuel ze Rom geseczet wart.

Source Fulltext: ZEIBIG, Klosterneuburg (=FRA II/10, Wien 1857) S. 77