Wir Ruger von gotes genaden Brobst ze Newnburch, tuen chunt allen den die disen prief lesent oder horent lesen daz di zwo swestern, di do hiezzen di schyemerinn vns ane iren lesten zeiten geschaft habent ledichleichen ain herwerge nahen pei sant Chvnegunten, di selben herwerge di lech her Hadmar, do er herr vnd brobst was, heinzelein seinem Chamerer zu seinen tagen, demselben heinzelein hab wir nvr genad getan durch seinev dienst vnd durch sein gebet vnd haben im erlaubet mit gemainem willen vnsrer herren, daz er di selben herwerge hat verchauft ver Gedrauten der Tuerchin ze rechtem purchrecht, vnd haben vns verczigen alles des rechts, des wir hincz der vorgeschriben herwerge haben gehabt. Daz aber diselbe vrowe ver Gedraut die Turkin von vns vnd von den, di nach vns chunftich sint, an dem selben purchrecht an mve vnd an alle ansprach beleibe, so hab wir ir disen prief gegeben zu ainer sicherhait gevestent mit vnserm insigel. Des sint geczeug her Jacob der Techent vnd all die chorherren, di zu der zeit gewesent sint ze Newnburch, her Fridreich der hutstoch, her Wernhart der schiver, her herman ymian, di ritter, Engeldiech von Maurbach, Gerunch vnd Tazze hern Choln svne, herman von Freysing, Chvnrat hern Rudweins svn, Alhart Seidel haberstro, Ott von yps, Ruedel von Grezz vnd ander frum leut, chnappen vnd purger, di do pei gewesen sint. Diser prief ist gegeben da von Christes gepurte sint gewesen Tausent iar drevhundert iar in dem andern iar an sant Gorgen tag.

Source Fulltext: ZEIBIG, Klosterneuburg (=FRA II/10, Wien 1857) S. 79