Wir Ruger von gotes genaden Brobst ze Newnburch verichen vnd tvn chunt allen den , die disen prief ansehent oder horent lesen die nv lebent vnd hernach chvnftich sint, daz der beschaiden mann Hainreich der Schreiber vnd sein chon vrow Jeutte recht vnd redeleich gechauffet habent vmb ir Ledichleich gvet ain phunt geltes vmb zehen phunt wienner phenning von Chunraten vnd von seiner chon Chvnegunden, vnd ist daz geschehen mit ir paider guetleichem willen, vnd daz selbe phunt geltes leit auf einer Mu^el in der nidern Weidnich vnd der vorgenant chauf ist geschen mit solher beschaidenhait, daz der vorgenant Chunrat dem egenanten Hainreichen aller ia\erleich daz vorgeschriben phunt wienner phenning geben sol an sant Merteinstag, tuet er des nicht, so sol Hainreich der egenant des nachsten tags darnach zwischpilde dar auf slahen vnd sol das sten vierzehen tage, vnd wert er in danne nicht, als purchrechtes recht ist, so sol Hainreich sich der mu^el vnderwinden vnd inne haben, vncz daz er seines dienstes gewert wirt. Darvber ist auch mit rede beschaiden, ob von vngelu^eche der güsse die wür so gar hin breche, daz der vorgenant chvnrat oder swer si inne hat, nicht wider pringen mach, so sol der oft genant Hainreich sich der mu^el vnderwinden, vnd sol si wider pringen vnd wider slahen mit seinem guet vnd sol si inne haben fur dasselbe guet, daz er darauf geleget hat, vnd für sein gu^elte vnd sol auch sei verdienen als sie der oft genant Chunrat hat verdienet. GO^eldelin vnd den andern den man von der mu^el vnd von der wür dienet aber ist mere an dem vorgedachten chauffe mit rede beschaiden, ob der vorgenant Chunrat dem egenanten Hainreichen ain phunt geltes geben wil an ainer andern stat, daz als gut ist oder pezzer, daz sol ligen an Hainreichs wal, ob ers tuen welle oder nicht. Vnd daz die vorgenanten sachen furbaz stete beleibe vnd vnzebrochen, des geben wir dem oft genanten Hainreichen vnd seiner chon vrown Jeutten vnd swem sis geben wellen, ze ainer vestenunge vnd ze ainem steten vrchunde disen prief mit vnserm insigel vnd mit vnsers amptmannes Gerunges insigel versigelten. Des sint geczeug Engelprecht der slüzzler, Gerbot vnd sein prüder Perchtold vnd Cristan, Fridereich Gauzrab, Weichart in der Weidnich, herman heczmann, Fridereich heczmann, vnd sein pruder herman, Leupolt vlschalch, Hainreich der pinter, Hainreich der phrevmler, Leutwein der Schreiber vnd ander ersame leut, die da pei gewesen sint. Dicz ist geschehen vnd diser prief ist gegeben, do von Christes gepurt ergangen waren Tausent iar, drevhundert iar vnd in dem andern iar dar nach an sant Ru^eprechtes tag in der vasten.

Source Fulltext: ZEIBIG, Klosterneuburg (=FRA II/10, Wien 1857) S. 77-78