Wir Rudolf von Gotes gnaden Hertzog van Osterich, vnd van Steyr, Herre van Chrayn, van der March, vnd van Portenawe veriehen vnd tvn chvnt allen den, di disen Brief sehent, oder horent lesen, Daz wir des gutes ze Hetzlesperg ein phvnt geltes, daz von dem Goteshaus ze Nevnburch Lehen ist, daz Vlreich Sibenhos van Nevnburch chovft hat vmb aht phvnd wienner phenning, datz Elzbeten, Pernhartes Witewen van Naternbach vnd Ir Svn Vlreichen rehter Scherme sein nach des Landes gewonhait in Osterich. Vnd darvber durch ir baider pet willen ze einer gehugnuzze geben wir disen brief versigelt mit vnsern Insigel, der brief ist geben ze Wienne, da van Christes geburd waren Tavsent Jar, Drev Hvndert Jar, dar nach in dem Dritten Jar, an dem Samstag nach vnser Vrowen Liechtmesse.

Source Fulltext: ZEIBIG, Klosterneuburg (=FRA II/10, Wien 1857) S. 81-82