In nomine domini. Amen. Quia prudenter debemus casibus futuris occurrere, siquidem exempla presencia nos premonent in futurum, ad cautelam igitur futurorum et indempnitati nostre ecclesie precavendum Nos Jacobus Decanus, Ortolfus, Hainricus de piela, Theodoricus plebanus ecclesie sancti Martini, Wisento, Paulus cellerarius, Perchtoldus Camerarius, Rugerus de Gobatsch, Hainricus de housek, Albero, Stephanus hospitalarius, Perchtoldus de als, Eberhardus Custos, Fridricus Custos sanctimonialium, Gerungus pedagogus, totusque Conventus ecclesie Newnburgensis Ordinis sancti Augustini Regularium Canonicorum pataviensis diocesis vnaminiter comuni consilio concordique voluntate ac proposito inspectoribus presencium vniversis notificamus protestamur, et protestacionem nostram patere cupimus per hoc scriptum: Quod Anno Domini M°CCC°III. XVIII° Kal. Maji, videlicet in die sanctorum Tiburcii et valeriani hora sexta dominus Hadmarus dictus asinus quondam prepositus ecclesie Newnburgensis, et Hainricus canonicus regularis ibidem vna cum suis complicibus laicis, scilicet domino Marquardo de Mistelbach, simulque aliis presentibus infra scriptis, qui huic facto aderant, scilicet domino Nycolao, Vlrico de Steigsperch, fratribus dicti domini Hadmari quondam prepositi, et quodam dicto de Eybenstal, et quodam dicto de Sibenhirten, Johanne de sancto loco, Ottone cognomento Chreuczer cum suo filio Gebhardo et sociis predictorum in Ecclesiam Newnburgensem ausu temerario irruentibus manu armata, scilicet gladiis, lanciis, cuspidibus, et balistis in personam domini Rugeri prepositi in mensa cum quibusdam fratribus seu canonicis ac aliis viris ydoneis ad prandendum consedentibus evaginatis gladiis impegerunt, ipsumque dominum Rugerum prepositum minus honeste de mensa eiectum cum ceteris qui ibi aderant, vestibus eciam ipsius laniatis eo invito in loco, ubi ad prandendum cum aliis consederat, detinebant ipsamque stubam viris armatis cingentes blasphemias amplissimas et contumelias irrogarunt eidem, claves et officinarum et res ecclesie, quas occupare poterant violenter a familia receperunt et nichilominus dominum Hadmarum predictum huius nefaude temeritatis capitaneum et auctorem in locum domini Rugeri prepositi sepefati locaverunt pro sue libitu voluntatis non sine multa iuris iniuria et contemptu ecclesiastice discipline. Preterea claves cellariorum et granariorum suis clientibus et familiis commiserunt, qui more raptorum pocius, quam conservatorum res ecclesie sine discrecione qualibet tamquam rapinam dissiparunt inter se quomodolibet dispensantes. Insuper hostium stube, in qua memoratum dominum Rugerum prepositum violenter detinebant tam impetuose cum custodibus observabant, ut nulli honestorum virorum preter eorum singularem licenciam vel favorem pateret aliqualiter aditus vel ingressus, immo paucis ad ipsum dominum prepositum de licencia predictorum malefactorum ingredientibus domum egressos verbis contumeliosis et probris plurimis affecerunt. Sicque in istis maleficiis die integro perdurarunt, donec tandem nuncii Illustris domine ducisse Austrie, scilicet Toczenpech et Chibergarius, quia illustris dominus dux Austrie absens erat et ad sanctorum limina direxerat gressus suos, nutu dei ad ipsius domini Rugeri prepositi liberacionem de Wienna celerius properantes cum honesta comitiva inclinata iam die omnino, hora scilicet completorii moti celo pietatis ex parte Illustris domine ducisse predicte eundem Rugerum prepositum sine armis et sine impetu quolibet verbotenus legacio peracta de maleficorum manibus liberarunt. Verum quia ipsius prelati minime interest iniuriam huiusmodi sibi et ecclesie illatam sic posse remittere, ne unde iura nascuntur inde nascatur iniuriarum occasio, protestamus omnes et publice profitemur, quod sepe dictus dominus Hadmarus quondam Newnburgensis ecclesie prepositus per sentenciam visitatorum, honorabilium virorum, videlicet fratris Cristani abbatis de Cella Angelorum, dominorum venerabilium Ekhardi et Anwici Sancti ypoliti et sancti floriani ecclesiarum prepositorum, et domini Gerlaci, Serenissime domine Romanorum regine Capellani per Reverendum dominum nostrum Wernhardum Pataviensis ecclesie Episcopum ad ecclesiam Newnburgensem ad visitandum ibidem destinatorum per eosdem. inquisicione ac visitacione diligencius observata et circumstanciis quibuslibet hincinde consideratis et perspectis causis seu articulis sue deposicionis et iuramento super hoc ab uno quoque fratrum seu Canonicorum singulatiter pro dicenda veritate prestito et recepto, omnibus hiis conscriptis ac sic per omnia iuris ordine observato est depositus a dignitate et officio prelature et ipsi dicti viri honorabiles scilicet visitatores memorati dominum Hadmarum sepefatum ab amministracione spiritualium seu procuracione temporalium penitus absolutum et liberum auctoritate ordinaria promulgarunt, Canonicos quoque et confratres totumque Conventum vna cum Sanctimonialibus a voto et ab obediencia, qua sibi astricti erant simili modo auctoritate ordinaria proclamarunt dantes nobis operacionem liberam eligendi prelatum seu prepositum, qui pro utilitate nostre ecclesie, ad amministracionem spiritualium et dispensacionem temporalium ydoneus videretur. Nos igitur unanimiter in nostro capitolo invocata spiritus sancti gracia missa dicta hora videlicet Tercia elegimus rite et legitime dominum Rugerum sepedictum in nostrum et ecclesie nostre dominum et prelatum, quem Reverendus in Christo Pater Dominus Wernhardus, Pataviensis episcopus sic electum rite et canonice confirmavit. Quo circa si dominus Hadmarus per se vel per alium aput sedem apostolicam vel alibi aliquid attemptaverit, procuraverit vel eciam literas impetraverit, profitemur cum protestacione in hiis scriptis, quod hoc non est nec fuit nec erit de nostra scitu, beneplacito vel consensu, quin imo sit et fiat pocius in nostrum et nostre ecclesie preiudicium non modicum et gravamen; cum ipse, videlicet dominus Hadmarus per suos errores et negligencias quam plurimas et per dilapidacionem ecclesie, sicut visitatores plenius conscripserunt et sicut patet luce clarius ex premissis, omni iuris benefici reddiderit se indignum. Insuper personis dictis et ecclesie nostre, cuius immunitatem violavit, satisfaccio condigna et conpetens nulla penitus nec per se nec suos aliqualiter est peracta. Facta est hec protestacio in nostra ecclesia Newnburgensi Anno Domini M°CCC°III° VIII° Kal. Junii presentibus viris suprascriptis et quam pluribus aliis fide dignis ad hoc vocatis, ad quorum noticiam eorum, que premissa sunt et evidenciam pleniorem sigilla, scilicet prepositi et capituli nostri presentibus sunt appensa.

Source Fulltext: ZEIBIG, Klosterneuburg (=FRA II/10, Wien 1857) S. 82-85