Ich Vlreich der alt von Riczendorf Vergich vnd tuen chunt - - - daz ich mit sambt meiner Chonnfrowen Mechthilden mit gesamter hant vnd mit gunst vnd gutleichen willen aller vnser erben - - - gesezet haben Lebmanne dem Juden ze Wienne, vnd seinen erben meinen hof, des anderthalb lehen ist, vnd leit daz Alpitowe ovf des Gotshauses aigen von Nevnburch vnd allez daz, daz darzue gehoret, von dem man alle iar dienet anderthalbe mutte Waizes vnd zwelf Schilling phenning vnd Weisend, der vnser Perchrecht ist (?) von dem vorgenanten Gotshaus, vnd darzue ein Werd der in der Tuenowe zwischen Ringleinse vnd sant Georgen gelegen ist, der ouch vnser lehen ist von demselben gotshovs fur funfzich phvnt phenning Wienner munzze. Da von dem heutigen tag gesovch ovfget auf ein isleich phvnt alle wochen seches phenninge als Lange, vnz wir si paide hauptguetes vnd schaden gar gewert. Vnd ist dis sazunge geschehen mit der hant des Ersamen herren Brobst Rugers von Newnburch der des vorgenanten hoves rechter Perchherre ist, vnd ovch des Werdes Lehenherre, also mit beschaidener red, ob so lange gesuech geht ovf den vorgenanten hof, vnd ouf den Werd, Vnz der paide nicht teurr sint, so sol Lebmann der Jud vnd seiner erben damit furbaz schaffen allen irfrum swi wellent Vnverzigen des Gotshouses reht, als Verre, daz Si paide haupt guetes vnd gesueches gar davon gewert werden. Vnd swaz in paide hovptgutes vnd gesueches an dem hof vnd dem Werd abget, daz schule si haben ovf vns, vnd ovf andern vnsern guet, daz Wir haben in dem Lande ze Osterreiche. Vnd sein auch wir, ich Vlreich der alt von Rizendorf vnd ich Mechthilt sein hovsfrowe des vorgenanten hoves vnd Werdes, vnd alles des darzu gehoret, Lebmannes des Juden vnd aller seiner erben, oder swem si den hof vnd dem Werde gebent, rehter gewer vnd scherm fur alle ansprache, als sazunge reht ist vnd des Landes reht ist ze Osterreiche. Diser sache ze einen vrchund vnd ze einen gezevge, vnd ovch ze einer Vestnunge gib ich Vlreich der vorgenant Lebmanne vnd seiner erben dise brief mit meinen Insigel versigelt. Diser brief ist gegeben ze Wienn, da man zalt nach Christes gepurte Dreuzehenhundert iar, Darnach in dem dritten Jar des nahsten suntags nach sand Lucientag.

Source Fulltext: ZEIBIG, Klosterneuburg (=FRA II/10, Wien 1857) S. 87-88