Wir Rudger von gottes gnaden Probst ze Newnburch, Her Jacob der Techant vnd alle die gemain der herren da selben tun chunt allen den, di disen prief sehent oder horent lesen, daz wir vnserm diener Hainreichen Phistermaister vmb seinev dienst, dev er vns langev zeit enpoten hat, haben gegeben vncz an seinen tot ein ganczev herren phrvnt von Chvchen, von Chasten, von Cheler. Auch hab wir im gelubt, daz wir in mit vnsern Chnappen chlaiden schullen gegen dem winter vnd gegen dem svmer, vnd die selben guet, di wir im haben getan auch darvmb, daz er lang an vnserm gotshaus herchomen ist, so hat er vns gegeben seinen weingarten, der do leit an dem Vrbar, des ein gancz jeuch ist mit solcher beschaidenhait, daz er den selben weingarten in gewer vnd in gewalt haben sol vncz an sein ende, vnd swan got vber in gepevt, daz wir in bestaten schullen vnd alles daz tuen sullen, daz wir tuen vnserm herren ainem aus vnserm convent. Dar vber so tuen wir chunt, ob wir oder vnser nochvaren den vorgenanten weingarten verchauffen oder zu vremden handen pringen, daz sich seinev vreunt zu demselben weingarten an aller vnser wider rede ziehen schullen, ist aver daz, daz der perchherre vns des selben weingarten nicht engan, so sol man den selben weingarten verchauffen vnd an ander gut legen iz sei purchrecht oder perchrecht, vnd zu dem selben gut, ob wir iz von vnserm gotshaus enphremden dahabent seinev vreunt daz selb recht zu, daz si habent zu dem vorgeschriben weingarten. Daz aber dicze geschefte stet beleibe, des hab wir im, dem vorgenanten Hainreichen disen prief gegeben mit vnsern insigeln gevestent. Di zeug, di do pei gewesen sint, daz sint di herren Jacob der techent, her Hainreich von Piela, her Dietreich der pharrer dacz sant Merten, her Ortolf, her Rudger von Gabasche, her Perchtold der Chamrer, her Hainreich von housek, her Otto von - ¹), her Stephan von Sirndorf, her Eberhart der custer, di chorhern von Newnburch, her fridrich der hutstoch, her Wernhart der schiver, her hermann ymian, di Ritter, Niclo des herczogen chuchenmaister, Germich herr Choln svn, Engeldiech von Maurpach, Dietel des Schiver svn, herman von freising, Reniger, Peter der chelerchnecht vnd ander trewe leut, di do pei gewesen sint. Diser prief ist gegeben do von Christes geburt ist gewesen Tousent Jar, drevhundert iar in dem dritten Jar an sant Thomas tag.

Source Fulltext: ZEIBIG, Klosterneuburg (=FRA II/10, Wien 1857) S. 88-89