Ich Wulvnich von Tribamwinchel vergich vnd tuen chunt allen den di disen prief horent oder lesent, di nv lebent vnd hernach chvnftich sint, daz ich mit meiner hausvrowen vrowen Maczen guetem willen.vnd auch mit aller meiner erben gvnst Chvnraden den vechter, der mein aigen gewesen ist, ledich vnd frei lazzen han vmb fvnf phunt phenning wienner munzz, di er mir gegeben hat, vnd han in geophert dem gotshaus vnser vrown ze Newnburch, also daz er alle iar ze sant Michels tag dar dienen sol vier phenning der vorgenanten mvnzz. Dar vber, ob der vorgenant Chvnrat, swenn er iz getuen mach, den vorgenanten dienst ab chauffen wil, des sol im der erber herre Brobst Rudger oder swer nach im brobst ist ze Newnburch vnd dev samnung gestatten vnd gonnen an alle widerred. Daz dev red also stet beleib vnd furbaz vnzebrochen, dar uber gib ich disen prief ze einer sicherhait mit meinem insigl versigelt. Diser sache sint geczeug her Wernhart der Pharrer von Tribanswinchel, her Hainreich von Sulcz, her friedreich der huetstoch, her Wernhart der Schiver, her herman ymian ze den zeiten richter ze Newnburch, Wernhart der richter ze dreschirchen, preunreich vnd peter der amman vnd ander frvm leut genuech. Diser prief ist gegeben ze Wienn, do nach Christes gepurt waren Tausent iar, drevhundert iar dar nach in dem vierden||
Jar an sant Lucien tag.

Source Fulltext: ZEIBIG, Klosterneuburg (=FRA II/10, Wien 1857) S. 93