Ich Chalhoch von Eberstorf, Chammerer in Oesterreich, veriehe vnd tuen chunt allen den, di disen prief lesent oder horent lesen, di nv lebent vnd hernach chunftich sint daz ich mit meiner erben guetem willen vnd gvnst, vnd mit verdachtem muete vnd auch ze der zeit, do ich iz wol getuen mochte, verlihen han den erbern leuten Chvnraden dem hutstokke vnd seinem prueder Diethreichen vnd allen iren erben paide Svnen vnd Tochtern meines rechten anerstorben aigens ain lehen, daz do leit do ze Pilichdorf, daz mich recht vnd redeleich an erstorben ist von meinem prueder pischolf Chvnraden von Chiemesse, dem got gnade. Daz selbe lehen mit alle dev vnd darczu gehorent ze holcz, ze velde vnd ze dorf, iz sei gestift oder vngestift, versuecht oder vnversuecht swi so iz genant ist, daz han ich in verlihen ze rechten lehen mit allen dem rechte, als man lehen leichen sol, ledichleichen vnd vreyleichen ze haben, vnd alle iren fromen damit ze schaffen, verchauffen, verseczen vnd geben swem si wellen an alle irrsal. Vnd habent mir darvmb geben di vorgenanten Chvnrat vnd Dietreich zehen March lO^etiges silber vnd zwelif phvnt wienner phenning, der ich recht vnd redeleich gewert bin. Vnd dar vber durch bezzer sicherhait so secze ich vorgenanter Chalhoch mich Chvnraden dem hutstokke vnd seinem prueder Diethreiche vnd allen irn erben paide svnen vnd thochtern vber daz vorgenante lehen da ze Pilichdorf vnd vber allez daz darczu gehort ze velde, ze dorfe, swie do daz genant ist, ze rechten scherm für alle ansprach als lehens recht ist vnd des landes recht zu Osterreich, vnd gib in darvber disen prief ze ainem sichtigen vrchvnde vnd ze ainem offen geczeug vnd ze einer ewigen vestenunge diser sache versigelten mit meinem insigel. Vnd sint auch des geczeug, her Vlreich, her Dietreich vnd her Otte die prueder von Pilichdorf, her Fridereich der hutstokk von Newnburg, Sweicher von Engelprechtestorf, Otte von ywanstal, Hainreich der Chamerer, Dietreich von Wolfgersdorf vnd ander frvme leut genuech. Diser prief ist geben ze Wienne, davon Christes gepurt waren ergangen Dreuczehen hvndertt Jar in dem vierden iar darnach des nachsten Erichtages nach sant Andres tag.

Source Fulltext: ZEIBIG, Klosterneuburg (=FRA II/10, Wien 1857) S. 92-93