Ich Gerunch hern Choln svn, Perchmaister des Gotshaus ze Newnburch, vergich offenleich vnd tuen chunt allen den, di disen prief lesent oder horent lesen, di nu lebent vnd hernach chunftich sint, daz Herbort von Wien vnd sein Chon vrow Alheit gelten suln Schoenmannen dem Juden vnd seiner Chon Racheln fvnf phunt wienner phenning, di si in gelihen habent des nachsten Mittichen nach sant Merteins tag vnd von demselben tag gent alle wochen zu gesuech auf iegleich phont acht phenning wienner munzze, vnd fvr haubtguet vnd fvr den gesuech der darauf gewachsen mach, haben si in rechte vnd redleich mit gesampter hant, do si ez wohl getuen mochten ze phand gesaczt irn weingarten an dem Chalnperge des einhalbcz ieuch ist vnd leit zwischen hern hermanes ymians weingarten vnd des Howenvelder weingarten vnd ist das geschehen mit meiner hant, wan ich des weingarten perchmaister pin, vnd mit aller ir erben guetlichem willen; vnd swas dem vorgenanten Juden an dem e geschrieben phande ab get, daz er hat auf Herwordes trewen vnd auf seiner hausvrowen trewen vnd auf alle dem, daz si habent in dem lande ze Osterreich. Vnd dar vber gib ich Gerunch dem oftgenanten Juden SchO^enman vnd seiner Chonn Racheln vnd ir paider erben ze vrchvnde vnd ze sicherhait disen prief mit meinem insigel versigelt. Diser sache sint gecceug her Perchtolt der Ober Chamerer, her Stephan von Syerndorf, die erbern chorhern, Engelprecht der Su^ezlzler, Chvnrath, Rudwein, herman von freising, Jacob von der obern chamer, Lentwein der Schreiber vnd di Juden Gersau, chazday, ysaac, aaron vnd ander ersam leut di da pei gewesen sint. Dicz ist geschehen, vnd diser prief gegeben, do von christes gepurd ergangen waren Dreuzehen hvndert iar vnd in dem virten jar dar nach, des nachsten Mittichen nach sant Merteins tag.

Source Fulltext: ZEIBIG, Klosterneuburg (=FRA II/10, Wien 1857) S. 91